Kriminal

10 yaşlı Nərminin qətli: təqsirləndirilən şəxs məhkəmədən bəraət istədi

13 Fevral 2024 18:25
Baxış: 1 505
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Tovuz rayonunun Dondar Quşçu kənd sakini, 10 yaşlı Nərmin Quliyevanın qətlində ittiham olunaraq Gəncə Ağır Cinayətlər Məhkəməsinin hökmü ilə 18 il müddətinə azadlıqdan məhrum edilən İlkin Süleymanovun apellyasiya şikayəti üzrə məhkəmə prosesi keçirilib və o, hakimdən bəraət hökmünün çıxarılmasını istəyib.

Milli.Az report-a istinadən xəbər verir ki, hakim Teyyub Muxtarovun sədrliyi ilə keçirilən prosesdə İ.Süleymanov çıxış edib.

O bildirib ki, istintaq dövründə işgəncələrə məruz qalıb, bir çox faktlar dəqiq araşdırılmayıb. İ.Süleymanov söyləyib ki, təzyiq və işgəncələrə görə cinayəti boynuna götürüb.

Müttəhim deyib ki, istintaq dövründə öz sübutunu tapmayan faktlara da məhkəmə dövründə düzgün baxılmayıb:

"İstintaq dövründə Nərmin Quliyevanın övladlığa götürmək istədiyimi deməyimə səbəb mənə verilən işgəncələr olub. İstintaq dövründə işgəncələrə dözə bilməyib Nərmin Quliyevanı övladlığa götürmək istədiyimi dedim. İstintaq zamanı qeyd olunub ki, guya mən cinayəti törətməzdən öncə meyitin hansı əraziyə aparılaraq yandırılması planını xəritə üzərində qərarlaşdırmışam. Bəyəm mən doğulduğum gündən bəri yaşadığım kəndi tanımırdımmı ki, xəritəyə baxırdım? Ümumiyyətlə istintaq dövründə saxta sübutlar yaradılıb və məni ittiham ediblər. Gəncə Ağır Cinayətlər Məhkəməsində barəmdə verilən qərarla qəti razı deyiləm".

N.Quliyevanın ailəsinin vəkili və prokuror isə Gəncə Ağır Cinayətlər Məhkəməsinin hökmünün dəyişdirilmədən qüvvədə saxlanılmasını istəyib.

Məhkəmənin növbəti iclası martın 5-nə təyin olunub.

Qeyd edək ki, Tovuz rayonunun Dondar Quşçu kənd sakini N.Quliyeva 2019-cu il noyabrın 21-də itkin düşüb, onun meyiti 2020-ci il yanvarın 6-da yandırılmış halda tapılıb. 2020-ci il yanvarın 10-da isə hadisəni törətməkdə şübhəli bilinən Dondar Quşçu kənd sakini, 1973-cü il təvəllüdlü İ.Süleymanov saxlanılaraq istintaqa cəlb edilib.
Ona Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələrində nəzərdə tutulan ittiham elan olunub. İlkin Süleymanov məhkəmənin qərarı ilə 18 il müddətinə azadlıqdan məhrum edilib.

Milli.Az
Xəbərlərimizi WhatsApp kanalımızdan da oxuyun

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.