30 ilin ən işıqlı və isti Şuşası - VİDEO

Şuşada 4-5 mərtəbəli 25 binadan ibarət yaşayış kompleksi inşa olunur

Şuşa şəhəri tam olaraq daimi elektrik enerjisi ilə təmin olunur. Bunun üçün 110 kilovoltluq yarımstansiya fəaliyyət göstərir. Şuşada şəhərdaxili paylayıcı şəbəkə, transfromatorlar quraşdırılır. İlkin mərhələdə bu ilin sonunadək beş transformator quraşdırılacaq. Onların gücü müvafiq obyektlərin işıqla tam təmin edilməsinə hesablanıb.

Bunu Prezidentin Şuşa rayonundakı xüsusi nümayəndəsi Aydın Kərimov Real Tv-yə müsahibəsində deyib.

O, hazırda şəhərdə istilik təchizatı sisteminin qurulmasına başlanıldığını bildirib.

Aydın Kərimov baş planın müfəssəl həllərinin artıq həyata keçirildiyini və bu işlərə mərhələ-mərhələ yerli, o cümlədən xarici investorların cəlb olunacağını deyib. Atılan mühüm addımlardan biri tarixi memarlıq abidələrinin bərpasıdır.

Artıq birinci mərhələdə 15 tarixi memarlıq abidəsinin bərpası layihələri üzrə işlər görülür və yaxın 2 ay ərzində onların bərpasına başlanacaq. Prosesə şəhərin mərkəzi küçələrində yerləşən tarixi abidələrin bərpası ilə start veriləcək. Bundan əvəl isə artıq iki abidə - Mola Pənah Vaqifin məqbərəsi və Bülbülün ev muzeyi bərpa olunub.

Prezidentin xüsusi nümayəndəsi, Şuşada keçmiş sovet Kommunist Partiyasının rayon komitəsinin yerləşdiyi və daha sonra işğal dövründə qondarma rejimin şəhər meriyasının yerləşdiyi binada da təmir işləri getdiyini bildirib.

Xüsusi nümayəndə, Şuşada böyük bir layihənin - yeni yaşayış kompleksinin təməlinin qoyulduğunu da bildirib. 9 hektar ərazidə 25 binadan, çoxmənzilli, 4-5 mərtəbəli, gözəl, Şuşa memarlığına uyğun, müasir elementləri də özündə əks etdirən, infrastrukturu tam müasir olan yaşayış kompleksi istifadəyə veriləcək. Şuşada qəzalı vəziyyətə düşmüş, baxımsız vəziyyətdə olan binalar var idi. Onların yerində gözəl memarlıq üslubu ilə inşa ediləcək binalar tikiləcək, o binalarda şuşalılar yaşayıb yaradacaqlar", - deyə Aydın Kərimov bildirib.

Milli.Az