İçərisində vətən boyda qeyrət yatan tabut - FOTO

Azərbaycan Ordusu dünyanın gözü qarşısında yeni qəhrəmanlıq salnaməsi yazdı.

Heç bir yazıçının cümləyə sığdıra, heç bir rejissorun filmində canlandıra, heç bir rəssamın təsvir, bəstəkarın nota köçürə bilməyəcəyi bir qəhrəmanlıqdan söhbət gedir. Bu tarixin hər sətri, hər kəlməsi qanla yazıldı, qəhrəman qardaşlarımızın qanı ilə. Onlar nəinki dünya üçün, elə bizim üçün də ən mümkünsüz görünən problemin öhdəsindən gəldilər. Vətən Müharibəmizdən qalib ayrılmağımızın səbəbi də məhz onların bu şərəfli missiyanı yerinə yetirə biləcəkləri ilə bağlı özlərinə olan böyük inam idi.

Azərbaycan Ordusu 44 gün, 44 gecə 30 ildir hər addımdan bir qazılan xəndəkləri, qurulan pusquları, sıldırım qayaları, sıx meşələri dişi, dırnağı ilə qarış-qarış keçərək bu qürurlu anları bizə canları, qanları bahasına bəxş etdilər. Bu qələbə azərbaycançılığı dünyaya bir daha sübut etdi. Dünya gördü ki, Azərbaycan danışıq masasında nə qədər konstruktiv, nə qədər ədalətli və sülhpərvərdirsə, döyüş meydanında da o qədər cəsarətli və döyüşkəndir. Tarixə qızıl həriflərlə yazılan bu böyük qələbə bir xalqa ən böyük sevinci yaşatmaqla yanaşı, onu bundan sonra da daha neçə onilliklərə sığdıra bilməyəcəyi Xocalı iztirabından, xəcalətindən xilas etdi.

Kimisi yeni ailə qurduğu həyat yoldaşını, kimisi azyaşlı körpəsini, kimisi də tək ümidi olan tənha anasını evdə tək qoyaraq döyüşə atılmağı özünə borc, şərəf, missiya hesab etdi. Təəssüf ki, müharibənin qələbə sevinci qədər bizi üzən şəhid xəbərləri də oldu. Vətən savaşının ən təsirli tablosu - üçrəngli müqəddəs bayrağa sarılan tabut, içərisində vətən boyda qeyrət yatan tabut çoxlarımızın yaşadığı məhləyə, kəndə, şəhərə gəldi.

Qələbəmizin əsas pay sahibi olan şəhidlərimiz, qazilərimiz qədər onların ailələri, doğmaları da bu şərəfli tarixdə özünəməxsus pay sahibi oldular. Bizi bu qələbəyə aparan əsas səbəblərdən biri də məhz övlad, həyat yoldaşı, qardaş itkisini "Vətən sağ olsun" deyib, cənazələrini qürurla qarşılayan şəhid ailələrinin duruşudur. 9 ay bətnində daşıdığı, beşiyini yellədiyi balasının cənazəsini çiynində son mənzilə aparan ana da gördük, yeni ailə qurduğu həyat yoldaşının tabutunun önündə gedən gənc qadın da. Şəhid valideynlərinin, yaxınlarının etdikləri bu fədakarlıq müharibənin gedişində ermənilərin başına açılan bir atəş oldu.

Ömür yolları ölkənin ayrı-ayrı rayonlarından, kəndlərindən, şəhərlərindən başlayan şəhidlərimizin qəhrəmanlıq dastanı Qarabağda başa çatdı, Qarabağ talelərini birləşdirdi.

Torpağı qanları ilə əbədiləşdirən, ölümləri ilə əbədiyyətə qovuşan şəhidlərimiz, siz qəhrəmanlığınızla torpağın altına yox, milyonların qəlbinə köçdünüz. Siz bir xalqın namusunu, taleyinə düşən qara ləkəni təmizləyərək ömür boyu vicdan əzabı ilə yaşamaqdan, şəhadətinizlə arzuları, xəyalları dəfn olunan, bir daha bir ola bilməyəcək təhlükəsinin astanasında olan xalqı xilas etdiniz. Siz ölmədiniz, siz ölümsüzlüyünüzü hər bir azərbaycanlının qəlbində əbədiləşdirdiniz.

Təhməz Əsədov
Milli.Az