Bankların sağlamlaşdırılması və əmanətlərin qaytarılması ilə bağlı təkliflər var

"Dəmirbank"ın bağlanması gözlənilən qərardır, çünki artıq xeyli müddətdir ki, sözügedən bank hətta kiçik məbləğli əmanətləri belə geri qaytara bilmirdi".

Milli.Az xəbər verir ki, bunu tanınmış iqtisadçı-ekspert, İqtisadi və Sosial İnkişaf Mərkəzinin (CESD) sədri Vüqar Bayramov bildirib.

Ekspert qeyd edib ki, "axsayan", öz fəaliyyətlərini yerinə yetirə bilməyən banklar var və onların sağlamlaşdırılması lazımdır: "Uzun müddətdir ki, belə bankların sağlamlaşdırılması üçün xüsusi dövlət proqramının hazırlanması ilə bağlı təklif verməyimizə baxmayaraq, təəssüf ki, Maliyyə Bazarlarına Nəzarət Palatası tərəfindən bu istiqamətdə hələlik real addımlar atılmayıb.

Yeni bir bankın müflis elan edilməsi bank sektoruna inamın azalması kimi mənfi təsirlərlə yanaşı, bankların konsolidasiyasının demək olar, mümkün olmadığından xəbər verir. Halbuki, konsolidasiya prosesi dəstəklənməli, eləcə də belə bankların sağlamlaşdırılması müflis elan olunmaların, xüsusən də, bank sektoruna olan inamın azalmasını qarşısını alar".

V.Bayramov hesab edir ki, müflis olan bankların sayı artdıqca qorunmayan əmanətlərin qaytarılması şansları azalır: "Belə ki, Əmanətlərin Sığortalanması Fondu qorunan əmanətlərin ödənilməsinə məsuldur. Fondun məlumatına görə, əvvəl müflis elan edilən 11 bank üzrə 747 milyon 938 min manat kompensasiya ödənilib. Bu yaxşıdır. Amma qorunmayan əmanətlərin taleyi necə olacaq? Müflis olan bank onu qaytarmaq öhdəliyi götürüb və həmin puldan istifadə edərək gəlir əldə edib. Müflis olduqdan sonra isə qorunmayan əmanət sahibinə qaytarılmır. Deməli, həmin əmanətlərin də qaytarılması mexanizmi işlənilməli və ən əsası bankların öhdəlikləri ilə aktivlərinin korrelyasiyası müəyyənləşdirilməlidir. Bütövlükdə isə, son addım bir daha göstərir ki, bank sektorunda ciddi islahatlara və eləcə də sağlamlaşdırma tədbirlərinə ehtiyac var".

İlkin İzzət

Milli.Az

Digər maraqlı xəbərlər Milli.Az-ın Facebook səhifəsində