Milli Qurtuluş Günü: Azərbaycan dövlətçiliyinin xilasından davamlı inkişafa doğru

Azərbaycan xalqının tarixində xüsusi əhəmiyyətə malik olan 15 İyun - Milli Qurtuluş Günü müasir dövlətçilik tariximizin dönüş nöqtəsi kimi qiymətləndirilir. Bu gün yalnız siyasi hakimiyyət dəyişikliyi ilə məhdudlaşmır, eyni zamanda Azərbaycanın müstəqilliyinin qorunması, dövlətçilik ənənələrinin möhkəmləndirilməsi və gələcək inkişaf strategiyasının müəyyənləşdirilməsi baxımından tarixi əhəmiyyət daşıyır.

XX əsrin sonlarında Sovet İttifaqının süqutundan sonra müstəqilliyini bərpa edən Azərbaycan Respublikası ciddi siyasi, iqtisadi və hərbi problemlərlə üzləşmişdi. Ölkədə hakimiyyət böhranı, idarəetmədə xaos, iqtisadi tənəzzül və Ermənistanın Azərbaycana qarşı təcavüzü nəticəsində yaranmış ağır vəziyyət dövlət müstəqilliyini təhlükə altına salmışdı. Xüsusilə 1993-cü ilin iyun hadisələri ölkədə vətəndaş qarşıdurması və dövlət çevrilişi təhlükəsini daha da artırmışdı.

Belə mürəkkəb tarixi şəraitdə Azərbaycan xalqının təkidli tələbi ilə ümummilli lider Heydər Əliyevin siyasi hakimiyyətə qayıdışı ölkənin taleyində həlledici rol oynadı. 1993-cü il iyunun 15-də Heydər Əliyevin Azərbaycan Respublikası Ali Sovetinin sədri seçilməsi müasir tariximizə Milli Qurtuluş Günü kimi daxil oldu. Bu hadisə dövlətçiliyin məhv olmaq təhlükəsindən xilas edilməsinin, siyasi sabitliyin bərpa olunmasının və milli birliyin təmin edilməsinin başlanğıcı oldu.

Heydər Əliyevin uzaqgörən siyasi fəaliyyəti nəticəsində qısa müddətdə ölkədə ictimai-siyasi sabitlik yaradıldı, qanunçuluq möhkəmləndirildi və dövlət idarəetmə sistemi təkmilləşdirildi. Onun rəhbərliyi ilə Azərbaycanın beynəlxalq aləmdə nüfuzu yüksəldi, xarici siyasətdə balanslaşdırılmış kurs formalaşdırıldı və ölkənin milli maraqlarına əsaslanan inkişaf strategiyası müəyyən edildi. 1994-cü ildə imzalanmış "Əsrin müqaviləsi" Azərbaycanın iqtisadi inkişafının əsasını qoyaraq ölkəni beynəlxalq enerji xəritəsində mühüm mövqeyə çıxardı.

Ümummilli lider Heydər Əliyevin müəyyənləşdirdiyi dövlətçilik konsepsiyası müasir Azərbaycanın inkişaf modelinin əsasını təşkil edir. Onun siyasi irsi milli maraqlara söykənən müstəqil dövlət quruculuğu, xalqın rifahının yüksəldilməsi və Azərbaycanın beynəlxalq nüfuzunun artırılması kimi fundamental prinsipləri özündə ehtiva edir.

Bu siyasi kurs hazırda Azərbaycan Respublikasının Prezidenti İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan regionun aparıcı dövlətlərindən birinə çevrilmiş, iqtisadi inkişaf, sosial rifah, infrastruktur quruculuğu və beynəlxalq əməkdaşlıq sahələrində mühüm nailiyyətlər əldə etmişdir. Son illərdə həyata keçirilən genişmiqyaslı islahatlar ölkənin davamlı inkişafını təmin etmiş, qeyri-neft sektorunun inkişafına və iqtisadiyyatın şaxələndirilməsinə mühüm töhfələr vermişdir.

Prezident İlham Əliyevin liderliyi dövründə Azərbaycanın beynəlxalq mövqeləri daha da güclənmiş, ölkəmiz bir çox nüfuzlu beynəlxalq təşkilatlarda fəal iştirakçı kimi çıxış etmişdir. Azərbaycanın milli maraqlarını qətiyyətlə müdafiə edən dövlət başçısının həyata keçirdiyi siyasət nəticəsində ölkənin siyasi və iqtisadi müstəqilliyi daha da möhkəmlənmişdir.

Azərbaycan tarixinin ən şanlı səhifələrindən biri olan 2020-ci ilin Vətən müharibəsində əldə edilmiş möhtəşəm Zəfər Prezident, Müzəffər Ali Baş Komandan İlham Əliyevin güclü liderlik keyfiyyətlərinin, uğurlu diplomatik fəaliyyətinin və məqsədyönlü dövlət siyasətinin nəticəsi kimi tarixə yazılmışdır. Ərazi bütövlüyümüzün və suverenliyimizin bərpası Azərbaycanın dövlətçilik tarixində yeni mərhələnin əsasını qoymuşdur. Bu qələbə həm də ümummilli lider Heydər Əliyevin əsasını qoyduğu güclü dövlətçilik strategiyasının uğurlu davamı kimi qiymətləndirilir.

Bu gün Azərbaycan Respublikası sabit siyasi sistemə, güclü iqtisadi potensiala və beynəlxalq nüfuza malik müasir dövlət kimi inkişaf edir. Milli Qurtuluş Günü isə xalqımızın dövlətçilik iradəsinin, milli həmrəyliyinin və güclü liderliyin təntənəsinin rəmzi olaraq tariximizdə əbədi yaşayır. 15 İyun yalnız keçmişə ehtiram deyil, həm də gələcəyə inamın, müstəqilliyimizin dönməzliyinin və Azərbaycanın davamlı inkişaf yolunun ifadəsidir.

Şölə Fərmanlı
Ağdaş Dövlət Humanitar Kollecinin müəllimi
Yeni Azərbaycan Partiyasının fəal üzvü