Prezidentin “Şöhrət” ordeni verdiyi Gövhər Baxşəliyeva kimdir? - DOSYE

Xəbər verdiyimiz kimi, Prezident İlham Əliyevin sərəncamı ilə Gövhər Baxşəli qızı Baxşəliyeva "Şöhrət" ordeni ilə təltif edilib.

Milli.Az Gövhər Baxşəliyevanın dosyesini təqdim edir.

- Gövhər Baxşəliyeva harada və nə zaman anadan olub?

Gövhər Baxşəliyeva 1954-cü ildə Bərdə şəhərində anadan olub. 

- Gövhər Baxşəliyeva harada təhsil alıb?

O, C. M. Kirov adına Azərbaycan Dövlət Universiteti (Bakı Dövlət Universiteti), şərqşünaslıq fakültəsini fərqlənmə diplomu ilə bitirib. 

- Gövhər Baxşəliyevanın karyerası barədə nə bilirik?

Gövhər Baxşəliyeva 1977-ci ildən h/v kimi AMEA Şərqşünaslıq İnstitutunda baş laborant, kiçik elmi işçi, elmi işçi, böyük elmi işçi, şöbə müdiri, elmi işlər üzrə direktor vəzifələrində çalışıb. Hazırda AMEA-nın İctimai Elmlər Bölməsinin sədri, akad. Z. Bunyadov adına Şərqşünaslıq İnstitutunun baş direktorudur.
Onun ümumilikdə 260-dan artıq məqalə və məruzəsi, 5 monoqrafiyası,18 kitabı, xaricdə isə 24 elmi əsəri çapdan çıxıb.

- Gövhər Baxşəliyevanın bir şərqşünas kimi hansı xidmətləri var?

Gövhər Baxşəliyeva klassik və müasir ərəb ədəbiyyatı, ərəbdilli Azərbaycan ədəbiyyatı, ərəb-Azərbaycan ədəbi əlaqələri, müqayisəli ədəbiyyatşünaslıq, mənbəşünaslıq, habelə şərqşünaslığın digər istiqamətlərinə aid tədqiqatlar aparıb.
Dünya ədəbiyyatı (ərəb ədəbiyyatı) ixtisası üzrə 21 fəlsəfə doktorları yetişdirib.
Azərbaycan elmini bir çox xarici ölkələrdə uğurla təmsil edib (Türkiyə, Rusiya, İran, Misir, Səudiyyə Ərəbistanı, Suriya, BƏƏ, Fransa, İngiltərə, İtaliya, Macarıstan, Rumıniya, Çin, Malaziya, İndoneziya və s.).
Həmçinin Şərqşünaslıq sahəsində Respublikada aparılan elmi işlərin koordinasiyası üzrə Problem Şurasının sədridir. "Şərq araşdırmaları" və "Azərbaycan şərqşünaslığı" dərgilərinin baş redaktorudur.
Filologiya elmləri doktoru, professor Baxşəliyeva 2018-ci ildən Azərbaycan İlahiyyat İnstitutunun Himayəçilər Şurasının üzvüdür.

-  Gövhər Baxşəliyeva ailəli olub?

O, Azərbaycan alimi və yazıçısı, filologiya elmləri doktoru, Azərbaycan Respublikasının xalq yazıçısı Kamal Abdullayev ilə evli olub. 

-  Gövhər Abdullayevanın siyasi fəaliyyəti olub?

Bəli. O, İkinci, üçüncü və dördüncü çağırış Azərbaycan Respublikası Milli Məclisinin deputatı olub. 
 

Milli.Az