“Valideynlər övladları ilə heyvan kimi davranmamalıdır” - FOTO

Son zamanlar yeniyetmə qızların evlərindən didərgin düşməsi, qəfildən yoxa çıxması halları çoxalmağa başlayıb. Bu hal ən çox 13-16 yaşlı qızlar arasında yaşanır.

Milli.Az xəbər verir ki, məsələ ilə bağlı Psixologiya elmləri namizədi, pedaqoq, sabiq millət vəkili Gülər Əhmədova "Yeni Sabah"a danışıb.

O bildirib ki, bu cür məsələlərdə ailənin rolu önəmlidir:

"Yetkinlik yaşına çatmayan qızların evdən qaçmasında iki mühüm faktor rol oynayır. Bunlar ailə və ətraf mühitdir. 

Həzrət Əli deyirdi ki, övladlarımız bizdən daha çox, yaşadıqları zəmanəyə bənzəyir. Bilməyinizi istəyirəm ki, Azərbaycan əxlaq, mədəniyyət qovşaqlarının kəsişdiyi bir yerdir. İnsanlar artıq mənəviyyat haqqında çox az düşünürlər. Bu məsələdə dinin də rolu var. Bakıətrafı kəndlər, Naxçıvan kimi klassik ailə dəyərlərinin qorunduğu bölgələrdə belə hadisələr demək olar ki, olmur".

Gülər Əhmədova yeniyetmə qızlara sosial şəbəkələrin necə təsir göstərdiyini də açıqlayıb:

"Bu gün cəmiyyətdə müxtəlif sosial platformalar öz mənfi təsirlərini açıq şəkildə göstərir. İnsanlar sosial şəbəkələrdən istifadə etdikcə bütün milli-mənəvi dəyərlərimizi yaddan çıxarmağa başlayırlar. 

Həmçinin, sosial şəbəkələrdə ziyanlı kontentlərə baxmaq təhsildən və sağlam vərdişlərdən uzaqlaşan, idmanla məşğul olmayan, dinimizi bilməyən və heç bir qibləsi olmayan qızlar və oğlanlar kütləsi yaradır. Beləliklə onlar evdən qaçır, ümumiyyətlə isə nə etdiyini və istədiyini bilmirlər".

Ekspert bildirir ki, valideynlər övladları ilə heyvan kimi davranmamalıdır:

"Şübhəsiz ki, ailədaxili tərbiyə, həm ata həm ananın rolu danılmazdır. Valideynlər cahil olmamalı, uşağa heyvan kimi davranmamalı (yeməyini, içməyini verdim, vəssalam), övladları ilə daima vaxt keçirməli, bir yerdə xeyrə-şərə getməli, dostluq etməlidirlər. Ələlxüsus qız anaları övladları ilə daha yaxından məşğul olmalı, problemləri ilə birbaşa maraqlanmalıdırlar. Analar öz qızlarının rəfiqəsi, sirdaşı olmağı bacarmalıdır. Düşünürəm ki, belə olduğu təqdirdə, sözügedən problemlər  öz həllini tapacaq".

Milli.Az
Xəbərlərimizi WhatsApp kanalımızdan da oxuyun