İrəvan “borc bataqlığı”nda: Pankin vaxt verdi, 5 ölkə cavab gözləyir

Rusiya xarici işlər nazirinin müavini Aleksandr Pankinin Ermənistanla bağlı açıqlaması İrəvanda narahatlıq doğurub.

XİN rəsmisi Ermənistanın 2026-cı ilin yanvarında Kollektiv Təhlükəsizlik Müqaviləsi Təşkilatına (KTMT) iki illik borcunun yığılacağını bildirib. Pankin qeyd edib ki, rəsmi İrəvan 2025-ci ilin sonuna kimi təşkilatın büdcəsinə ödənişlər edə bilməsə, üzv dövlətlərin müxtəlif variantları nəzərdən keçirməsi gözləniləndir.

O, nəticədən asılı olmayaraq heç bir ölkənin təşkilatdan qovunulmasının düşünülmədiyini söyləyib. Ermənistanın da sadəcə iştirakını dondurduğunu, lakin hələ də üzv olaraq qaldığını vurğulayıb.

İrəvanın borcunu qaytara bilməyəcəyi təqdirdə, KTMT-nin hansı tədbirləri nəzərdən keçirməsi gözləniləndir?

Globalinfo.az-a danışan politoloq Murad Sadəddinov deyib ki, Ermənistan ilə KTMT arasında uzun müddətdir problemlər yaşanır:

"Rəsmi İrəvan təşkilatı 44 günlük müharibə zamanı Ermənistana lazımı dəstək verməməkdə ittiham edir. Halbuki, bu iddialar tamamilə əsassızdır. Çünki KTMT üzvləri də Azərbaycanın öz ərazilərində döyüşdüyünü, müharibənin Ermənistan ərazisinə daşınmadığını bildirirlər.

Ermənistan tərəfi verilən izahlara baxmayaraq tənqidlərinə davam edir. Hətta İrəvan hökuməti təşkilatın iclaslarına qatılmayaraq bir növ etirazını bildirməyə başladı. Bu da öz növbəsində KTMT ilə problemlərin daha da artması ilə nəticələndi.

İndi məlum olur ki, Ermənistan Kollektiv Təhlükəsizlik Müqaviləsi Təşkilatının (KTMT) büdcəsinə ödənişləri də etmir. Özü də vəziyyət iki ildir belədir. Lakin yenə də Ermənistanın təşkilatdan uzaqlaşdırılacağını düşünmürəm. Çünki KTMT özü də bu gün yaxşı vəziyyətdə deyil. Təşkilata yeni üzvlərin qəbul edilməməsi ilə yanaşı, mövcud üzvlərdən birinin çıxarılması da müsbət nə isə verməyəcək. Əksinə, bu vəziyyət Ermənistanın istədiyi bir şeyin reallaşması deməkdir".

Milli.Az