Dünya

Dünya Bankı: İqlim dəyişmələri daxili miqrasiyanın kütləvi hal almasına səbəb olacaq

15 Sentyabr 2021 23:50
0 Şərh     Baxış: 618

2050-ci ilə qədər təqribən 216 milyon insan yanğınlar, daşqınlar, quraqlıq və qasırğalar ucbatından öz evini tərk etməyə və öz ölkələrində daha təhlükəsiz və əlverişli həyat şəraiti axtarmağa məcbur olacaq.

Milli.Az AZƏRTAC-a istinadən bildirir ki, bu barədə Dünya Bankının yeni məruzəsində xəbərdarlıq edilir.

Bankın ekspertləri xatırladırlar ki, qlobal istiləşmənin sürətlənməsi dəhşətli istilərə, quraqlığa, yanğınlara, qasırğalara, leysan yağışlarına və daşqınlara səbəb olacaq. Qütblərdə buzlaqların əriməsi dəniz səviyyəsinin artmasına gətirib çıxaracaq. Bütün bu səbəblər üzündən xeyli insan öz doğma şəhərlərini və kəndlərini tərk etməyə, başqa yerlərdə, əsasən öz ölkələrində daha yaxşı həyat şəraiti axtarmağa məcbur olacaq.

Hazırda Yer kürəsinin temperaturu sənayeləşmədən əvvəlki dövrlə müqayisədə təqribən 1,2 dərəcə yüksəkdir. İstiləşmənin davam etməsi ona gətirib çıxaracaq ki, 2050-ci ilə qədər dünyanın altı regionunda 216 milyon insan öz ölkələrinin başqa rayonlarına köçüb gedəcəklər. Ekspertlər bir sıra regionlarda iqlimlə bağlı daxili miqrasiya ocaqlarının daha əvvəl - 2030-cu ilə qədər formalaşa biləcəyini də istisna etmirlər.

Dünya Bankının proqnozlarına görə, 2050-ci ilə qədər Böyük Səhradan cənubda yerləşən Afrika ölkələrində daxili "iqlim miqrantları"nın sayı 86 milyona, Şərqi Asiya və Sakit Okean regionunda 49 milyona, Cənubi Asiyada 40 milyona, Şimali Afrikada 19 milyona, Latın Amerikasında 17 milyona, Şərqi Avropa və Mərkəzi Asiyada 5 milyona çata bilər.

Bununla belə, məruzə müəllifləri vurğulayırlar ki, bu göstəricilər yalnız proqnozdur. Onlar əmindirlər ki, qlobal tullantıların azaldılması, ekoloji, inklüziv və davamlı inkişaf ilə bağlı təcili tədbirlər görülməsi daxili miqrasiyanı 80 faiz azaltmağa imkan verər.

Məruzədə yalnız üç region: Şərqi Asiya və Sakit okean bölgəsi, Şimali Afrika, habelə Şərqi Avropa və Mərkəzi Asiya barədə informasiya təqdim edilib.

Milli.Az

Şərh yaz:

0 Şərh:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.