Ağ Evdən Türkiyə üçün xoşagəlməz açıqlama: “Həqiqət qəbul edilməlidir”

Milli.Az xəbər portalı Türkiyənin "Vatan" qəzetinə istinadən xəbər verir ki, ABŞ Milli Təhlükəsizlik Şurasının rəsmi nümayədəsi Mayk Hammer sabahkı səsverməyə münasibət bildirib. Onun sözlərinə görə, prezident Barak Obama 24 aprel 2009-cu il müraciətində 1915-ci idə baş vermiş hadisələrlə bağlı mövqeyini bildirib: "Biz həqiqətlərin dürüst və ədalətli qəbuluna tərəfdarıq. Bu hədəfə çatmağın ən yaxşı yolunun erməni və türk xalqlarının münasibətləri normallaşdırması səyləri çərçivəsidə keçmişdə yaşananları da ələ almalarının olduğuna inanırıq. Bu səyləri dəstəkləməkdə davam edəcəyik".

Türkiyə isə Vaşinqtonda lobbiçilik fəaliyyətini gücləndirib. Bir tərəfdən Türkiyə Böyük Millət Məclisinin iqtidar və müxalifətdən olan üzvlərindən ibarət nümayəndə heyəti danışıqları davam etdirir, digər tərəfdən isə yeni səfir Namik Tan türk və yəhudi lobbisi ilə işləyir.  Səfirin təmasları fayda verməyə başlayıb. Mənzil-qərargahı Vaşinqtonda yerləşən JİNSA yəhudi institutu qondarma soyqırımı ilə bağlı qanun layihəsinin qəbuluna qarşı çıxıb. İnstitutun açıqlamasında deyilir ki, ABŞ Konqresi başqa xalqların tarixinin müzakirə olunacağı bir yer deyil. JİNSA hesab edir ki, Türkiyə və Ermənistan müstəqil ölkə kimi mübahisələri özləri həll etməlidirlər.

Bununla belə, son vəziyyət Türkiyənin əleyhinədir. Konqresin xarici əlaqələr komitəsində 46 millət vəkili var. Onlardan 26-sı Barak Obamanın təmsil etdiyi Demokrat Partiyasından, 20-si isə Respublikaçılar Partiyasından seçilib. Erməni seçicilərə yaxınlığı ilə seçilən demokratlardan 18-nin qanunun qəbuluna səs verəcəyi dəqiqdir. Respublikaçılar arasında isə 7 millət vəkilinin Türkiyənin əleyhinə səs verəcəyi gözlənilir. Əgər belə olsa, o zaman qanun layihəsi 25 nəfər lehinə, 21 nəfər əleyhinə olmaqla qəbul edilə və Konqresə göndərilə bilər. Amma son qərarın verilməsi spiker Nensi Pelosidən asılıdır. Ermənilərin sıx yaşadığı Kaliforniyadan seçilən Nensi Pelosi qondarma soyqırımı iddialarını dəstəkləyir. Lakin son anda Barak Obamadan gələcək bir telefon zəngi qərarı dəyişdirə bilər.

Milli.Az