Soyuducunuzdakı köhnə süd qutusu ventilyatorun buz kimi üfürməsini təmin edir

Yaz və yay mövsümünün gəlişi ilə birlikdə istilər bir anda boğucu səviyyəyə çatdı. Qapalı məkanlarda nəfəs almağın belə çətinləşdiyi bu günlərdə çoxumuz çarəni ventilyatorların qarşısına keçməkdə tapırıq. Lakin məlum bir həqiqət var: Ventilyatorlar əslində otağı soyutmur, sadəcə daxildəki isti havanı dövr etdirir.

Milli.Az xəbər verir ki, xoşbəxtlikdən, evinizi real mənada sərinlətməyin və ventilyatorunuzu sanki bir kondisionerə çevirməyin, hər kəsin mətbəxində tapılan bir əşya ilə edilən çox bəsit bir yolu var: Köhnə süd qutusu!

Ventilyatorlar otaqdakı istiliyi yox etmir, sadəcə havanı hərəkət etdirərək dərimizdəki tərin qurumasını təmin edir. Bu, anlıq bir rahatlıq gətirsə də otaq temperaturunu aşağı salmır. Lakin ventilyatorun önünə donmuş bir əşya qoyduqda işlər dəyişir. Buz ərimək üçün ətrafdakı istilik enerjisini çəkir; ventilyator da bu sayədə yaranan buz kimi havanı otağa üfürür.

Hər hansı bir plastik şüşə də işə yaraya bilər, lakin mütəxəssislərə görə, boş süd qutuları (karton və ya plastik böyük ölçülülər) məhz bu iş üçün ən uyğun olanıdır. Süd qutuları həm daha çox su tutur, həm də səth sahələri daha genişdir. Beləcə normal su şüşəsi ilə müqayisədə otaqdakı istiliyi çox daha sürətlə sorur və evinizi daha uzun müddət sərin saxlayır.

Bu metodu evinizdə təhlükəsiz və effektiv şəkildə tətbiq etmək üçün bu addımları izləyin:

Təmiz bir süd qutusunu təxminən dörddə üçü (75%-i) dolana qədər su ilə doldurun. Suyu tam doldurmayın; çünki su donarkən genişlənir və qutunun partlamasına səbəb ola bilər.

Hazırladığınız qutuyu dondurucuya (buzluğa) qoyun və tamamilə donmasını gözləyin.

Donan qutunu dondurucudan çıxarın. Xaricində yaranacaq tərləmə (kondensasiya) və ərimə sularının parketinizə və ya masanıza zərər verməməsi üçün altına bir dəsmal sərin.

Qutunu ventilyatorun tam önünə qoyun. Təhlükəsizlik qeydi: Nəmin ventilyatorun mühərrikinə və ya elektrik hissələrinə toxunmasının qarşısını almaq üçün qutu ilə cihaz arasında mütləq təhlükəsiz məsafə saxlayın.

Cihaz arxadan aldığı havanı buz qəlibinə vuraraq otağınıza yayacaq və çöl nə qədər isti olursa olsun, anında kondisioner effekti yaradacaqdır.

Müəllif: Ülkər Vəliyeva (Milli.Az redaktor)