Ukrayna qan ağlayır: Slavyanskdan qorxunc xəbərlər, daha bir şəhər əldən çıxdı - YENİLƏNİB

14:08

Rusiyayönümlü fəallar Ukraynanın Donetsk vilayətinin Debaltsevo Şəhər Şurasını ələ keçiriblər. Trend-in çərşənbə axşamı "RBK-Ukrayna" saytına istinadən verdiyi məlumata görə, Debaltsevo ərazisindən Rusiyadan və əks istiqamətdə dəmiryol daşımaların böyük hissəsi keçir.

Rusiyayönümlü fəalların təzyiqi altında Şəhər Şurasının deputatları mayın 11-nə təyin edilmiş regionun statusu haqqında referendumu dəstəkləmək qərarına gəliblər.
Dinc yolla binanını ələ keçirənlər heç bir maneə ilə rastlaşmayıblar.

X X X 

Ukrayna prezidenti vəzifəsini icra edən parlamentin spikeri Aleksandr Turçinov Odessa Dövlət Vilayət Administrasiyasının rəhbərini dəyişib.

Trend-in çərşənbə axşamı "RBK-Ukrayna" saytına istinadən verdiyi məlumata görə, yeni administrasiya rəhbəri İqor Palitsa təyin edilib.
O, bu vəzifədə Vladimir Nemirovskini əvəzləyib.

---------
12:10

Ukraynanın şərqində keçirilən antiterror əməliyyatı zamanı 30-dan çox terrorçu öldürülüb.
APA-nın məlumatına görə, bu barədə özünün "Facebook" səhifəsində Ukraynanın daxili işlər naziri Arsen Avakov yazıb.

"Biz 4 nəfəri itirmişik, 20 nəfər yaralımız var. Terrorçulardan isə 30 nəfər öldürülüb, onlarla yaralı var. Onların arasında xeyli sayda krımlı var, rusları da görmək olar. Bu gün çeçenlər də olub", - deyə o vurğulayıb.

---------
11:17

Mayın 2-də Ukraynanın Odessa şəhərində baş verən hadisələrdən sonra 46 nəfərin həlak olması ilə yanaşı, 48 nəfər də itkin düşüb. Milli.Az Rusiya mətbuatına istinadən xəbər verir ki, morqlarda onlarla adamın cəsədi tanınmaz halda qalıb.

Şəhərin yeni təyin edilmiş milis rəisi İvan Katerinçuka xalq tərəfindən güclü basqı var. İnsanlar cinayətkarların tezliklə aşkar edilərək cəzalandırılmasını tələb edirlər.

Ötən səhər isə şəhər 2 may hadisələri zamanı həlak olmuş insanlarla vidalaşıb. 6 nəfər, o cümlədən anti-maydan mövqeyinə görə seçilən deputat Vyaçeslav Markin dəfn edilib.

Kiyev hökuməti isə şəhərə elit qvardiya göndərib.

--------
09:23

Son məlumatlara əsasən, mayın 5-də Ukraynanın Slavyansk şəhəri ətrafında döyüşlərdə 4 nəfər ölüb, 15 nəfər xəsarət alıb.

Milli.Az APA-ya istinadən bildirir ki, bu barədə RBC saytına Slavyansk özünümüdafiə qüvvələrinin qərargahında bildiriblər.
 
Bundan əvvəl Semyonovka kəndi yaxınlığında  federallaşma tərəfdarları və Ukrayna hərbçiləri arasında baş verən toqquşma barədə məlumat yayılıb.
 
Anti-terror əməliyyatı keçirildiyi ərazidə dəmiryolu nəqliyyatının fəaliyyəti və avtobusların hərəkəti tamamilə dayandırılıb.

Milli.Az