298 kilodan dünya çempionatına: 193 kq arıqladı - (Foto)

İngiltərədə yaşayan 29 yaşlı Cek Ako çəkisi 298 kiloqrama çatdıqda həyatını dəyişməyə qərar verib. Təxminən 193 kiloqram arıqlayaraq 105 kiloqrama enən Ako dördillik transformasiyadan sonra hazırda bodibildinq yarışmasına hazırlaşır. "298 kiloqramdan sonra dünya çempionatında yarışa bilirəmsə, həqiqətən də hər kəs hər şeyi bacara bilər" deyən gənc hekayəsi ilə arıqlamaq mübarizəsi aparanlara ilham verir.

Milli.Az xəbər verir ki, Cek Akonun arıqlama hekayəsi qeyri-sağlam qidalanma vərdişlərinin həyatına ciddi şəkildə təsir etdiyi dövrdə başlayıb. Gündə təxminən 10 min kaloriyə yaxın qəbul edən Akonun rasionunda pizza, hamburger, çips və şokolad üstünlük təşkil edirdi.

Çəkisi 298 kiloqrama çatan gənc həmin dövrdə güzgüyə baxmağa nifrət etdiyini bildirib. Həyatını dəyişməyə qərar verən Ako dörd il ərzində təxminən 193 kiloqram arıqlayaraq 105 kiloqrama qədər enib.

Ako qidalanma rejimini tamamilə dəyişdirib və müntəzəm olaraq idmanla məşğul olmağa başlayıb. Yaşadığı böyük dəyişiklikdən sonra şəxsi məşqçi kimi fəaliyyətə başlayan gənc özünün çəki itirmə üzrə kouçinq biznesini də idarə edir.

Keçmişdə pilləkənləri çıxmaqda belə çətinlik çəkdiyini qeyd edən Ako artıq rahatlıqla 5 kilometr qaça bildiyini və ağır çəkilər qaldıra bildiyini ifadə edib.

Artıq dərilərindən qurtulmaq üçün iki dəfə əməliyyat keçirən gənc artıq yeni hədəfə köklənib.

Ako indi Buckinghamshire-da keçiriləcək "Pure Elites Dünya Çempionatı"nda yarışmağa hazırlaşır.

Onun üçün yarışmanın mənası sadəcə kubok qazanmaq deyil. Keçmişdə yaşadığı böyük çəki problemindən sonra səhnəyə çıxmasının oxşar mübarizələrdən keçən insanlara ümid verəcəyinə inanır.

Ako uğurun arxasında sehrli bir pəhrizin və ya tək bir məşqin olmadığını, dəyişimin əsasında sabitlik, səbr və hər gün yenidən mübarizə aparmağın dayandığını qeyd edib.

Müəllif: Ülkər Vəliyeva (Milli.Az redaktor)