Qazaxıstanın vitse-prezidentinin adı 7–10 gün ərzində açıqlanacaq - Tokayev

Qazaxıstanın vitse-prezidenti vəzifəsini tutacaq şəxsin adı gələn həftə və ya 10 gün ərzində məlum olacaq.

Milli.Az xəbər verir ki, bu barədə Qazaxıstan Prezidenti Kasım-Jomart Tokayev kütləvi informasiya vasitələrinin nümayəndələri üçün keçirdiyi brifinq zamanı bildirib.

"Hər kəs vitse-prezident vəzifəsi ilə bağlı sual verir. Həqiqətən də bu, mühüm dəyişiklikdir. Biz bu yeni vəzifəni Konstitusiyada məqsədli şəkildə təsis etdik. Desəm ki, bu vəzifə son dərəcə zəruridir, yanılmaram. Hazırkı mürəkkəb dövrdə belə bir vəzifə ölkəmiz üçün xüsusilə vacibdir. Vitse-prezident postunu kimin tutacağı gələn həftə və ya 10 gün ərzində məlum olacaq. Hazırda onun adını çəkmək tez olardı. Düşünürəm ki, bu, hamınızın yaxşı tanıdığı tanınmış bir şəxs olacaq", - deyə prezident bildirib.

Tokayev qeyd edib ki, Qazaxıstanda digər islahatlar da həyata keçiriləcək.

"Məsələn, yeni dövlət orqanı - Qazaxıstan Xalq Şurası fəaliyyətə başlamalıdır. Bildiyimə görə, bəzi vətəndaşlar onu Assambleya ilə müqayisə edirlər. Hesab edirəm ki, Qazaxıstan Xalq Şurası əvvəllər Assambleyanın yerinə yetirdiyi işi gücləndirməyə və inkişaf etdirməyə imkan verəcək. Demək olar ki, bu, yeni çoxfunksiyalı siyasi mexanizmdir. Əminəm ki, Qazaxıstan Xalq Şurasının fəaliyyəti səmərəli olacaq", - deyə Tokayev bildirib.

Onun sözlərinə görə, ölkənin gələcək inkişafı ilə bağlı planlar genişmiqyaslıdır.

"Daha əvvəl də dediyim kimi, Qazaxıstan böyük tikinti meydançasına çevrilməlidir. Hər bir vilayət mərkəzində, rayonlarda və şəhərlərdə iri tikinti layihələri həyata keçiriləcək. Poliklinikalar, uşaq reabilitasiya mərkəzləri və digər sosial obyektlər inşa ediləcək. Astanada yeni körpü, Dombra Sarayı və Su Resurslarının Tədqiqi Mərkəzi kimi mühüm obyektlər yaradılacaq. Şəhərlərin abadlaşdırılması vacibdir. "Taza Qazaxıstan" aksiyası ardıcıl şəkildə davam etdirilməlidir", - deyə Tokayev bildirib.

O vurğulayıb ki, ölkənin gələcək inkişafı naminə fəal işləmək lazımdır.

"Hamımız birlikdə, bütün xalq olaraq işə başlamalıyıq. Qazaxıstandan başqa Vətənimiz yoxdur və hər birimiz onun inkişafına öz töhfəmizi verməliyik. Ümumilikdə, seçki kampaniyası yaxşı keçdi. İctimai-siyasi arenaya yeni simalar çıxdı, məzmunlu və konstruktiv ideyalar səsləndirildi. Düşünürəm ki, bu Kurultay ölkəmizin inkişafına yeni təkan verəcək", - deyə Tokayev bildirib.

Müəllif: Malik Məlikov (Milli.Az redaktor)