ÜST-dən xəbərdarlıq: “Görünməmiş sürətlə yayılır”

"Açıq deməliyik ki, epidemiya hələ də nəzarət altında deyil. Böyük bir üstünlüklə başladı və biz hələ də onun qarşısını almağa çalışırıq".

Milli.Az qafqazinfo-ya istinadən xəbər verir ki, bunu Ümumdünya Səhiyyə Təşkilatının (ÜST) baş direktoru Tedros Adhanom Qebreyesus Ebola virusunun Bundibuqyo variantı ilə bağlı Beynəlxalq Səhiyyə Qaydaları üzrə Fövqəladə Komitənin iclasında çıxışında deyib.

O, Konqo Demokratik Respublikasında (KDR) yayılan Ebola epidemiyasının görünməmiş sürətlə genişləndiyini açıqlayıb.

Qebreyesus bildirib ki, epidemiya əvvəlki Ebola epidemiyalarından daha sürətlə yayılır və həm milli, həm də beynəlxalq miqyasda yayılma riski yüksək olaraq qalır.

ÜST rəhbərinin sözlərinə görə, hazırda KDR-nin 6 əyalətində və 55 səhiyyə rayonunda təxminən 5 min nəfər yoluxub, 2300-dən çox insan isə həyatını itirib.

Qebreyesus epidemiyanın yayılmasında təhlükəsizlik problemləri, əhalinin məcburi köçü, yollar, çaylar və mədən marşrutları boyunca intensiv hərəkətin mühüm rol oynadığını bildirib.

O, Ebola epidemiyasının indiyədək qeydə alınan ən böyük yayılmalardan biri olduğunu və əvvəlki epidemiyalarla müqayisədə daha sürətli irəlilədiyini vurğulayıb.

Qebreyesus bildirib ki, risk yalnız KDR ilə məhdudlaşmır. Onun sözlərinə görə, Uqandada ilk yoluxma hadisəsindən sonra virusun yayılması dayandırılıb, lakin ötən ay bir səyahətçi virusu Fransaya aparıb.

Təşkilat KDR hökuməti, Afrika Xəstəliklərə Nəzarət və Profilaktika Mərkəzləri və digər tərəfdaşlarla birlikdə epidemiyanın qarşısının alınması istiqamətində fəaliyyətini genişləndirir.

Qebreyesus Bundibuqyo virusuna qarşı hazırlanmış iki peyvəndin ilk dəfə insanlar üzərində klinik sınaqlara daxil edildiyini açıqlayıb.

Bundan əlavə, başqa bir peyvəndin heyvanlar üzərində aparılan tədqiqatlarda çarpaz qoruyucu təsir göstərdiyi və onun 3-cü mərhələ klinik sınaqlarına hazırlanıldığı bildirilib.

ÜST-ün dəstəklədiyi PARTNERS müalicə sınağına isə hazırda 100 xəstənin cəlb edildiyi açıqlanıb.

Qebreyesus epidemiyanın qarşısının alınması üçün daha sürətli məlumat mübadiləsi, gücləndirilmiş epidemioloji nəzarət, davamlı maliyyələşmə, təhlükəsiz giriş imkanları və sərhədyanı koordinasiyanın vacib olduğunu qeyd edib.

Qeyd edək ki, Ebola virusu ağır hemorragik qızdırmaya səbəb ola bilir. Virus ilk dəfə 1976-cı ildə eyni vaxtda indiki Cənubi Sudanın Nzara şəhərində və Konqo Demokratik Respublikasının Yambuku kəndində qeydə alınıb.

Virus adını Konqo Demokratik Respublikasında epidemiyanın baş verdiyi əraziyə yaxın yerləşən Ebola çayından alıb.

2013-2016-cı illərdə Qvineya, Liberiya və Syerra-Leonedə baş verən Ebola epidemiyası xəstəliyin ən ağır yayılmalarından biri olub. Həmin dövrdə 30 mindən çox insanın yoluxduğu, 11 mindən çox insanın isə öldüyü bildirilir.

Konqo Demokratik Respublikasında hazırkı epidemiyada yayılan Bundibuqyo variantı ilə bağlı isə səhiyyə orqanlarının məlumatına görə, hazırda xüsusi təsdiqlənmiş müalicə və ya peyvənd mövcud deyil.

Müəllif: Tural Hüseyn (Milli.Az redaktor)