Dünya

İlon Maskın sərvəti ilk dəfə bu qədər azaldı

11 Fevral 2025 16:12

Baxış: 645

#DÜNYADA #MARAQLI #ABŞ

Tesla səhmlərinin kəskin ucuzlaşması nəticəsində İlon Maskın sərvəti 2025-ci ildə ilk dəfə 400 milyard dollardan aşağı düşüb.

Milli.Az xəbər verir ki, Bloomberg-in məlumatına görə Tesla səhmləri dekabrın ortasında tarixi zirvəyə çatsa da, son iki ayda 27% ucuzlaşıb. Xüsusilə, Almaniyada tədarüklərin 59% azalması və Çində satışların 11,5% geriləməsi şirkətə mənfi təsir göstərib. Fevralın 10-da Tesla səhmləri 3% ucuzlaşaraq 350,73 dollara düşüb.

Dekabr ayında Tesla səhmləri və opsionları Maskın sərvətinin 60%-dən çoxunu təşkil edirdi. ABŞ prezidenti Donald Tramp administrasiyasının elektrikli avtomobillərlə bağlı gözlənilən siyasət dəyişiklikləri hələlik Tesla üçün müsbət nəticə verməyib.

Xatırladaq ki, 2024-cü ilin dekabrında SpaceX-in səhm satışından sonra Maskın sərvəti 439,2 milyard dollara yüksəlmiş və onu 400 milyard dollar sərhədini aşan ilk şəxs etmişdi. Lakin Tesla səhmlərinin dəyər itirməsi və süni intellekt startapı xAI-nın böyüməsinin yavaşlaması Maskın sərvətinə ciddi təsir edib.

Fidan
Milli.Az