İdman

Bədii gimnastlar gəncəli gimnastlara mənəvi dəstək nümayiş etdiriblər - FOTO

14 Oktyabr 2020 09:28

Baxış: 957

VTB-də minimal faiz dərəcəsi ilə nağd kredit 9.9%-dən

#GİMNASTİKA

Bədii gimnastika üzrə Azərbaycan yığma komandasının üzvləri 2 gün öncə Ermənistan silahlı qüvvələri tərəfindən raket hücumuna məruz qalmış Gəncə şəhərinə yollanıblar.

Azərbaycan Gimnastika Federasiyasından Milli.Az-a verilən məlumata görə, Zöhrə Ağamirova, eləcə də qrup hərəkətləri komandasının üzvləri Gəncədən olan bədii gimnastlarla görüşərək onlara mənəvi dəstək olublar. Gimnastlar Gəncədən olan həmkarlarına hədiyyələr də təqdim ediblər.

Daha sonra gimnastlarımız raket atəşi nəticəsində insan tələfatı və dağıntılar olan hadisə yerinə baş çəkmiş, həmin yerə gül dəstələri qoymuşlar.

Xatırladaq ki, 11 oktyabr gecə saat 2 radələrində Azərbaycanın ikinci ən böyük şəhəri olan Gəncə Ermənistan ərazisindən növbəti dəfə raket hücumuna məruz qalıb. Nəticədə 10 nəfər həlak olmuş, 6-sı azyaşlı uşaq olmaqla 34 mülki vətəndaş yaralanmışdır.

Yığma üzvləri həmçinin, hadisə zamanı zərərçəkmiş ailələrə də baş çəkiblər.

Gimnastlarla birlikdə Gəncəyə yollanan bədii gimnastika üzrə Azərbaycan yığma komandasının Baş məşqçisi Mariana Vasileva baş verənlərdən və gördüklərindən çox təsirləndiyini bildirib.

"Baş verənləri şəkillərdən deyil, canlı olaraq görmək, zərər çəkən insanların yaşadıqlarını onların dilindən eşitmək tam başqa hisslər yaşadır. Xüsusilə də valideynlərini itirmiş uşaqların üzündəki kədəri görmək çox ağırdır. Bəziləri nəyin baş verdiyini belə anlamırlar. Analarını itirmiş uşaqlar isə onların hələ də qayıdacağını düşünürlər. Bu gün burada gördüklərimi heç vaxt unutmayacağam."

M.Vasileva qeyd edib ki, bütün dünya həqiqəti bilməlidir.

Azərbaycan Gimnastika Federasiyası bütün gimnastika ictimaiyyəti adından həlak olan şəxslərin yaxınlarına dərin hüznlə baş sağlığı verir, yaralılara isə şəfa diləyir.

Milli.Az