"Neftçi" rəhbərliyinin qərarı qəbuledilməzdir" - Tərlan Əhmədov

CBC Sport kanalında Premyer Liqa klublarının baş məşqçilərinin iştirakı ilə Tok-şou təşkil edib.

Milli.Az sportal.az-a istinadən xəbər verir ki, verilişdə "Keşlə"nin çalışdırıcısı Tərlan Əhmədova "Neftçi" rəhbərliyindən incimisiniz" sualı ünvanlanıb. 48 yaşlı mütəxəssis cavabında bunları səsləndirib:

"Bir az çətin sualdır. Həmkarım (Roberto Bordin - red) qeyd etdi ki, "Neftçi" son 5 ildə nəticə qazanmamışdı və onların gəlişlərindən sonra uğur olub. Əfsuslar olsun ki, mən "Neftçi"ni qəbul edəndə 5 turdan sonra 1 xalı var idi. Mən ora dəvət ediləndə xahiş edilmişdi ki, "Neftçi" hücum futbolu oynamalıdır. Qarşımıza heç olmasa, 4-5-ci yerləri tutmaq hədəfi qoyuldu. Amma mən rəhbərliyə demişdim ki, komandanı mükafatçılar sırasında olmasına çalışacağıq. Mən işimi gördüm və son 4 il nəticə verməyən komanda 3-cü oldu.

İlk gəlişimdə Emin Mahmudovla Rəşad Sadiqovu komandaya dəvət elədim. Qışda isə 3 əcnəbi transfer etdik. Gənclərə də şans verirdik. Ömər Buludov və digərlərini oynadırdıq. Hər bir məşqçi istəyər ki gördüyü işin bəhrəsi olsun. Əgər biz mükafatçılar siyahısına düşürüksə, Avropada da çıxışımıza davam etmək istəyirik. İşimizin bəhrəsini təsnifat mərhələlərində görmək istəyirik. İşimizin bəhrəsini görmədik.

"Neftçi"ni rəhmətlik Böyükağa Hacıyevlə birlikdə Avropa Liqasının qrupuna çıxarmışdıq. O dövrdə təcrübə qazanmışdım, bilirdim ki, hardasa xeyrim dəyər. Mayda müqaviləm bitirdi. Gəncədə "Kəpəz"ə qarşı oyun keçirdik və qalib gəldik - 2:1. Sonra 8 gün işimə gəlib-getdim. Mənə kimsə müqavilə barədə nəsə demədi. Ona qədər bir neçə təklifim var idi, amma susdum. Düşündüm ki, işimi görmüşəm, yəqin davam edərik.

Mənə mayın 31-i dedilər ki, komandanı tərk etməlisən. Müşahidə Şurasının belə qərar verdiyini dedilər. Mən 9 ay ərzində Müşahidə Şurasından ancaq Çingiz Abdullayevi görmüşdüm. Onunla görüşümüz mükafatlandırma mərasimində baş vermişdi. Hər qələbədən sonra Çingiz müəllimin təbrik mesajları gəlirdi, bu gün də saxlamışam. Mən Müşahidə Şurasından bir adamı belə görməmişdim və mənə sonda deyilən bu oldu. İndiki klub rəhbərliyinin qərarı tək Tərlan Əhmədov üçün yox, digərləri üçün də qəbuledilməzdir. Çünki ordan çox adamlar getdi".

Milli.Az