Haiti mətbuatı "Qarabağ"dan yazdı

Haitinin "Le National" nəşri Azərbaycanın "Qarabağ" klubundan yazıb.  

Milli.Az Kenson Dezinin müəllifi olduğu yazının oxuculara maraqlı olacağını nəzərə alaraq məqaləni onların diqqətinə çatdırır. 

"Donald Qeryenin də çıxış etdiyi Azərbaycanın "Qarabağ" klubu Çempionlar Liqasının ikinci təsnifat mərhələsinin cavab oyununda rəqibi "Kukesi"ni 3:0 hesabı ilə məğlub edərək, mübarizədən kənarlaşdırıb. Beləliklə, Donaldı və komanda yoldaşlarını turnirin qrup mərhələsindən cəmi 2 oyun ayırır.

"Qarabağ" klubu yavaş-yavaş Çempionlar Liqasının qrup mərhələsinə doğru irəliləyir. Azərbaycanın son çempionu ikinci təsnifat mərhələsində Albaniyanın "Kukesi" klubunu mübarizədən kənarlaşdırıb. İlk matçda "Qarabağ" səfərdə 0:0 hesablı heç-heçəyə nail olmuşdu. Donald Qeryenin də meydana çıxdığı və rahat keçən cavab qarşılaşmasında "Qarabağ" doğma meydanda rəqibini 3:0 hesabı ilə məğlub edib.

Meydan sahibləri hesabı 24-çü dəqiqədə Dani Kintananın 11 metrlik cərimə zərbəsindən vurduğu qolla açıblar. Birinci hissə 1:0 hesabı ilə Donaldın komandasının qələbəsilə başa çatıb. İkinci hissədə Dani Kintana yenə də penaltidən fərqlənərək komandasının üstünlüyünü 2 topa çatdırıb. Bu hesab "Qarabağ"ın növbəti mərhələyə yüksəlməsini təmin edirdi. Lakin Con Delarj matçın əsas vaxtının bitməsinə 1 dəqiqə qalmış hesabı 3:0 edərək bütün suallara aydınlıq gətirib.

İndi qrup mərhələsindəki 6 yer uğrunda 12 klub mübarizə aparır. Donaldlı "Qarabağ" növbəti mərhələdə Belarusun "BATE Borisov" klubu ilə qarşılaşacaq. İlk oyun avqustun 7-də "Qarabağ"ın meydanında keçiriləcək. Komanda uğur qazanarsa, Donald Qerye son 2 ildə ikinci dəfə Çempionlar Liqasının qrup mərhələsində iştirak etmək imkanı qazanacaq. Bu, Haiti çempionatından çıxmış futbolçu üçün görünməmiş müvəffəqiyyət olacaq".

(Fransız dilindən tərcümə - WorldMedia.Az)

Milli.Az