Cəmiyyət

Qubada 70 il əvvəl qurulan, 110 nəfərdən ibarət Mirzəbəyovlar ailəsi - VİDEO

13 Sentyabr 2021 22:20
2 Şərh     Baxış: 908

Qubanın Bağçalı kəndində yaşayan Şirinbəy və Səbiyyə Mirzəbəyovlar ailə qurmalarının 70-ci ilini qeyd edirlər.

Milli.Az AZƏRTAC-a istinadən bildirir ki, toy mərasimi 1951-ci ildə olan Mirzəbəyovlar ailəsində 10 övlad dünyaya gəlib- 5 qız, 5 oğlan. Hazırda Şirinbəy Mirzəbəyovun 89, həyat yoldaşının isə 85 yaşı var.

"Çətinliklərin öhdəsindən hər zaman birlikdə gəlməyə çalışıb, birgə mübarizə aparmışıq. Ailəmizin möhkəmliyinin sirri də elə xoş günlərdə birgə sevinib, çətində bir-birimizə arxalanmağımız, həyat yüklü məsələlərdə birgə qərar verməyimizlə bağlıdır. On uşağımız olub. Qızları köçürtmüşəm, oğlanları da evləndirmişəm. Yaxşı da, pis də günlərimiz olub. Əsas məsələ odur ki, mübahisə elədin, bir problem oldu, sonda gərək bir yolunu tapıb barışasan. Əgər mehriban dolanmaq istəyirsizsə can deyib, can eşitməlisiniz", - deyə ailə başçısı Şirinbəy Mirzəbəyov indiki gənclərə tövsiyələrini çatdırıb.

70 il birlikdə həyat sürən nənə və babanın hazırda 34 nəvəsi, 62 nəticəsi, 2 kötükcəsi var. Hər zaman halal zəhmətləri ilə ailəsini dolandıran Mirzəbəyovlar el-oba arasında hörmət və izzət qazanıblar.

Ailənin yükünü sevimli həyat yoldaşı ilə birlikdə çiyinlərində daşıyan Səbiyyə Mirzəbəyova bildirir ki, sağlam, tərbiyəli, ağıllı, zəhmətkeş uşaqlar böyütdüklərinə görə özlərini dünyanın ən xoşbəxt insanları sayırlar və övladları ilə fəxr edirlər.

"Yoldaşım gedib işləməyə, evə pul gətirib, çörək gətirib, mən isə uşaqları saxlamışam. Kolxoz dövründə işləmişik, gecə paltar yuyub, gündüz işə getmişəm. Beş qız köçürmüşəm, beş gəlin də gətirmişəm. Övladlarımı ayrı-seçkilik etmədən, fərq qoymadan böyütmüşəm", - deyə Səbiyyə Mirzəbəyova söyləyib.

Nümunəvi ailələrdən olan Mirzəbəyovların məsləhətləri ailə münasibətlərinin düzgün qurulması istiqamətində yaşanan çətinliklərin həllində dəyərli və əhəmiyyətlidir. Bu mehriban ailənin uzun və şərəfli həyat yolu keçməsi gənclərə parlaq örnəkdir.

Milli.Az

Şərh yaz:

2 Şərh:

  • Anonim
    777 · 14 Sentyabr 09:3500

    Allah ömür versin, sağlam qocalıq keçirəsiniz

    Cavab yaz
  • Anonim
    !!! · 14 Sentyabr 09:3600

    Maşallah.

    Cavab yaz

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.