Kiş çayının təhlükəsi

Milli.Az-ın Kanal S televiziyasına istinadən verdiyi məlumata görə, Şəkinin şimal-şərqində yerləşən və ən dağıdıcı çaylardan olan Kiş çayının daşması hər zaman böyük təşvişə səbəb olur. Çayın səviyyəsinin qalxması ərazidə sel təhlükəsi yaradır. Bəndin olmaması isə əhalinin narahatlığını daha da artırıb. Şəkinin Kiş çayında zaman-zaman baş verən daşqınlar şəhər üçün böyük fəsadlar yaradır.

Daşqınların əksəriyyəti yaz mövsümündə yağışların yağması zamanı baş versə də belə bir təhlükə qış aylarında da mövcuddur. Lakin daha böyük təhlükə selin lil formasını almasıdır. Bu isə selin dağıdıcı gücünü bir neçə qat artırır. Çayın bəzi yerlərində salınan bəndin yüksək olmaması isə təhlükəni qaçılmaz edir. Bununla belə, Kiş çayı yağış və qar suları ilə qidalanan bir çay olduğundan, yaz aylarında suyun səviyyəsinin artması təbiidir. Yəni dağlardakı qarın əriməsi səbəbilə sel təhlükəsi gözləniləndir. Ancaq hazırda Şəki ərazisində axan çaylarda sel təhlükəsi gözlənilmədiyi bildirilir. Bununla belə, aidiyyatlı qurumdan verilən məlumatda çayın yatağının ilboyu təmizləndiyi bildirilir. Soyuqbulaq deyilən ərazidən başlayaraq cənuba doğru seldən müdafiə məqsədi ilə  tikilmiş beton divarlar onun eninin daralmasına səbəb olub. Buna görə də çayın kənarındakı bəndin möhkəmləndirilməsi zərurəti meydana çıxır.

Çayın Kiş kəndi ərazisindən axan hissəsində də bənd yoxdur. Bəndin olmaması isə kəndi çox böyük təhlükə qarşısında qoyur. O ki qaldı lil selinə, belə bir daşqının yaşanması çox uzaq bir ehtimaldır. Lakin əgər belə bir şey baş verərsə, Şəki buna hazır olacaq.

Kiş çayı olduqca təhlükəli çaylardandır. Çayda hər 10 ildən bir güclü daşqınlar baş verir. Ötən əsrdə çayın dəfələrlə məcrasından çıxması nəticəsində rayona böyük ziyan dəyib. Çay məcrasında dərinləşdirmə işləri aparılsa da bu çayın yenidən fəsadlar törədə biləcəyi ehtimalı yüksək olaraq qalır.

Milli.Az