Cəmiyyət

"Xalqımızın birliyi koronavirusla mübarizədə də ön plana çıxmalıdır"

14 Oktyabr 2020 15:31
Baxış: 496

Son proseslər göstərdi ki, Azərbaycan xalqı bir olmağı, yekdil olmağı, mütəşəkkil olmağı, həmrəy olmağı ən yüksək səviyyədə bacaran xalqdır. Bizim ən böyük gücümüz də elə məhz bu birliyimizdir. Fəqət, həmin birlik nümunəsi çox təhlükəli olan və bütün dünyanı cənginə alan koronavirusla mübarizədə də ön plana çıxmalıdır.

Milli.Az bildirir ki, bunu Trend-ə Milli Məclisin deputatı Elşən Musayev deyib.

Deputat bildirib ki, bu gün hamının ürəyi Qarabağdadır, Qarabağ bizlər üçün ən ümdə arzudur, istəkdir:

"Qarabağ adı olan yerdə bizim beynimizə başqa bir ad, fikir, düşüncə gəlmir. Qarabağ bizim məhz fikir priotitetimizdir. Amma dəyərli xalqımın nümayəndələri elə məhz Qarabağ sevdasına görə, elə məhz ön cəbhədə olan əsgərlərimizi qorumaq amacı ilə öz sağlamlığını da qorumalıdır. Çünki sağlamlıq çox böyük şərtdir.

Son günlər pandemiya kontekstində yoluxmanın artan dinamika üzrə irəliləməsi bizim hər birimizi narahat edir və bu fakt qətiyyən gözdən qaçmamalıdır. Çünki arxa cəbhə də öz cəbhə qədər önəmlidir. Hazırda demək olar ki, hamının ailəsindən, əqrəbasından kimsə cəbhə bölgəsindədir, əsgərdir. Potensial qəhrəmanlarımız isə Vətən qorumaq həvəsi ilə orduya gedəcəyi, Vətən qarşısında şərəfli borcu yerinə yetirəcəyi günü böyük səbrsizliklə gözləyirlər.

Bax biz həm də onları qorumalıyıq, həm də onlara görə çox təhlükəli koronavirusdan ehtiyat eləməliyik. Üstəlik, bir daha qeyd edirəm: "Bu bəla bütün dünyanı lərzəyə salan bəladır. Belə bir məqamda isə demək ki, bizlərin üzərinə daha böyük məsuliyyət, hətta ikiqat məsuliyyət düşür. Elə etməliyik ki, insan itkimiz məhz bu həssas məqamda az olsun, ermənini məğlub etdiyimiz kimi koronavirusu da məğlub edək. Və əminəm ki, bunu bacaracayıq".

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.