Qadınlar icra başçısı, polis olmalıdır - FOTO

Milli.Az xəbər portalının məlumatına görə, Demokratik İslahatlar Partiyasının (DİP) təşəbbüsü ilə "Azərbaycanın ictimai-siyasi həyatında qadınların rolu" mövzusu bu gün ictimai müzakirəyə çıxarılıb.
DİP sədri Asim Mollazadə qeyd edib ki, qadınlar Azərbaycanın taleyində həlledici rola sahib olan önəmli qüvvədir. "Biz qadınların rolunun ictimai-siyasi həyatda artırılması, onların bu sahədəki fəaliyyətlərinin dəstəklənməsi üçün bütün mümkün vasitələrdən, əlimizdəki imkanlardan istifadə etməyə çalışırıq. Bu Dəyirmi Masanı da təşkil etməkdə məqsədimiz, Azərbaycanın ictimai-siyasi həyatında qadınların roluna nəzər salmaq, bu sahədəki problemlərin aradan qaldırılması üçün təklifləri dinləmək və müvafiq addımların atılması üçün zəmin hazırlamaqdır".

Millət vəkillərindən Elmira Axundova, Qənirə Paşayeva, Gülər Əhmədova, Ailə, Uşaq və Qadın problemləri üzrə Dövlət Komitəsinin sədr müavini Aynur Sofiyeva, ABŞ-ın Azərbaycandakı səfirinin xanımı Zeyno Baran Brayza, Azəri-Türk Qadınlar Cəmiyyətinin sədri Tənzilə Rüstəmxanlı, APA-nın direktoru Vüsalə Mahirqızı, Milli.Az xəbər portalının rəhbəri Sevda Həmidova, Jurnalist Qadınlar Assosiasiyasının sədri Sevil Yusifova, "Qadın Liderliyi Uğrunda" İB-nin "Liderlik" kursunun dinləyiciləri, bir sıra aparıcı QHT rəhbərləri mövzu ilə bağlı fikirlərini bölüşüblər.

Burada icra strukturlarında, parlamentdə, məhkəmə-hüquq sistemində qadınlarla bağlı kvotaların müəyyənləşdirilməsi, ictimai-siyasi cəhətdən fəal olan xanımların cəmiyyətdə təbliğ olunması, qadınların və onların inkişafına, irəli getməsinə əngəl olan kişilərin maarifləndirilməsi, televiziyalarda təbliğat çarxlarının yayımlanması və s. kimi təkliflər səsləndirilib.

Elmira Axundova deyir ki, qadınlara qarşı ayrı-seçkiliyin aradan qaldırılması və cəmiyyət həyatında fəal iştirakları üçün mütləq icra hakimiyyətlərində rəhbər vəzifələrdə qadınlar təmsil olunmalıdırlar: "Bizdə heç bir qadın icra başçısı yoxdur. Amma yaxşı olardı ki, bütün icra hakimiyyətlərində ən azı icra başçısının müavini qadın olsun".

Gülər Əhmədova isə deyir ki, qızlarımız Polis Akademiyasında təhsil almaqdan çəkinməmlidirlər: "Dünyanın hər yerində polis sistemində xanımlar da işləyir. Bizdə də qadın inspektorlar olmalıdır. Çünki ailə-məişət münaqişələri zamanı zorakılıqlarla görə qadınlarımız kişi polislərə müraciət etməkdən, öz ərlərini yad kişilərə "satmaqdan" çəkinirlər. Milli mentalitetimiz buna yol vermir və həmçinin belə qadınlar həmin evdə, ailədə qəbul olunmurlar. Yəni, qadın ərindən polisə şikayət edib, sonra həmin evə qayıda bilməz. Qadınlarımızın dərdini, çikayətini deyə biləcəyi qadın polis məmurları olmalıdır".

Zeyno Baran Brayza bildirib ki, əslində dünyanın hər yerində yaşayan qadınların üzləşdikləri çətinliklər və maneələr eynidir: "Sadəcə olaraq qarşınıza maneələr çıxdıqda geri çəkilməyəcək, təslim olmayacaqsınız, hər şeyə rəğmən ideallarınız uğrunda irəli gedəcək, mübarizə aparacaqsınız".

Milli.Az