Cəmiyyət

Xaçmazda daha bir məktəb binası açıldı - FOTO

20 Dekabr 2012 16:04

0 Şərh Baxış: 2 127

VTB-də minimal faiz dərəcəsi ilə nağd kredit 9.9%-dən

Milli.Az Regional TV-yə istinadən xəbər verir ki, Xaçmaz rayonunun Müzəffəroba kəndində inşa edilən 180 şagird yerlik təhsil ocağının təntənəli açılış mərasimi keçirilib. Bu münasibətlə təşkil olunan mərasimdə Xaçmaz Rayon İcra Hakimiyyətinin başçısı Şəmsəddin Xanbabayev, təhsil şöbəsinin rəhbər şəxsləri, məktəbin müəllim və şagird kollektivi, eləcə də kənd sakinləri iştirak ediblər. Şəmsəddin Xanbabayev çıxış edərək bildirib ki, son illər ölkəmizin hər yerində olduğu kimi Xaçmazda da müasir tipli yeni məktəb binalarının inşası geniş vüsət alıb. Təhsilin inkişafına dövlət qayğısı ildən-ilə artır.

Son illərdə Azərbaycanda 2 minə yaxın yeni məktəb binası tikilib istifadəyə verilmişdir ki, bunların 31-i Xaçmaz rayonunda inşa olunub. Bundan başqa, rayondakı əksər məktəb binaları əsaslı təmir edilib, təhsilin maddi-texniki bazası daha da möhkəmləndirilib.

Tədbirlərdə çıxış edən müəllim və şagirdlər, kənd ağsaqqalları yeni məktəbdə təhsilin keyfiyyətinin yüksək olacağına əminliyini ifadə edib. Ardından yeni təhsil müəssisəsinin açılışını bildirən rəmzi qırmızı lent kəsilib. Mərasim iştirakçıları məktəbdə tədris üçün
yaradılan şəraitlə tanış olublar.

Tikintisinə cari ilin may ayında başlanılan iki mərtəbəli təhsil müəssisəsi müasir istilik və işıqlandırma sistemi ilə təchiz edilib. Doqquz sinif otağı, kitabxana, akt və idman zalları, eləcə də yeməkxanası olan məktəbdə kompüterlər quraşdırılıb.

Bu cari ildə Xaçmaz rayonunda istifadəyə verilən 3-cü məktəb binasıdır. Bundan əvvəl 480 şagird yerlik Uzunoba və 600 şagird yerlik Köhnə Xaçmaz kənd tam orta məktəblərinin açılışı olub.

Milli.Az

Böyütmək üçün şəkillərə klikləyin.