Cəmiyyət

Professor Rəhim Hüseynovun əziz xatirəsi onu tanıyan insanların qəlbində həmişə yaşayacaq

5 Dekabr 2012 20:50
Baxış: 517
Bu il Azərbaycan elminə ağır itki üz verib. Bilindiyi kimi, AMEA-nın müxbir üzvi, Əməkdar müəllim, fizika-riyaziyyat elmləri doktoru, professor Rəhim Əyyub oğlu Hüseynov ömrünün 88-ci ilində vəfat edib.

R.Ə.Hüseynov 1924-cü il sentyabrın 9-da Şuşa şəhərində doğulub.

1941- 1946-ci illərdə Azərbaycan Dövlət Universitetinin (indiki BDU) fizika- riyaziyyat fakültəsinin tələbəsi, 1946- 1949- cu illərdə " astrofizika" ixtisası üzrə aspirantı olub. O, Azərbaycan SSR Elmlər Akademiyasının universiteti ilə birgə elmi ekspedisiyanın iştirakçısı olmuş " Günəş" atmosferinin bəzi radioptik xususiyyətləri" adlı namizədlik dissertasiyası müdafiə edib. Onun Günəş protuberanslarına aid işləri 1938- 1961- ci illər arasındakı müddəti əhatə edən eruptiv protuberanslar kataloquna daxil edilib. Sonralar o, Günəş alışmasını Balmer kontikiuunda görünməsi şərtini, onun incə quruluşunu araşdırıb, alışmaların parametrlərinin təyin metodunu işləyib.

Rəhim Hüseynov Pirqulu stansiyasında, sonralar astrofizika bölməsində
"Günəş xidməti" adlanan işin təşkili və aparılması ilə məşğul olmuş, rəsədxananın müasir avadanlıqla təchiz edilməsi üçün çalışıb, burda işlədiyi 20 il ərzində rəsədxananın yaradılması və inkişafı ilə bağlı işlər görüb. 1957-ci ildə Yerin ilk süni peyki buraxılan ərəfədə o, peykləri müşahidə etmək üçün xüsusi "Günəş fizikası" bölməsi yaratmış və ona rəhbərlik edib.

Onun sonrakı araşdırmaları ən təlatümlü fiziki proseslər, çox böyük enerji ayrılması, yüklü zərrəciklər seli, milyon tonlarla kütlə atılmaları ilə nəticələnən və " Günəş alışmaları " adlanan törəmələrin hərtərəfli öyrənilməsinə həsr olunub və onun "Günəş alışmalarında dinamik prosesləri" adlı doktorluq dissertasiyasında öz əksini tapıb.
2001-ci ildə "astrofizika " ixtisası üzrə AMEA-nın müxbir üzvü seçilib.

R.Ə.Hüseynov onlarla fəlsəfə elmlər doktoru və fəlsəfə doktoru hazırlayıb. 100-dən çox elmi əsəri (o cümlədən 30-dan çoxu xarici ölkələrdə) çapdan çıxıb. O, bir sıra monoqrafiyaların , 70-dən çox məqalələrin, 6 elmi kütləvi kitabın, ali və orta məktəb üçün dərsliklərin müəllifidir.

Həm müəllifi, həm də redaktoru olduğu, fizika-riyaziyyat elmi üzrə doqquz min söz və söz birləşmələrindən ibarət olan Azərbaycanca-Rusca-İngiliscə ilk fundamental Astronomiya Terminləri Lüğətinin işıq üzü görməsində prof. R.Hüseynovun böyük əhəmiyyət kəsb etdiyi xidmətlərindəndir.

R.Ə.Hüseynov Beynəlxalq Astronomiya İttifaqının və Avropa Astronomiya Cəmiyyətinin üzvü olub.

2003-cü ildə Azərbaycan Respublikası Prezidentinin sərəncamı ilə "Əməkdar müəllim " fəxri adına layiq görülüb.

Müasir Azərbaycan fizika elminin görkəmli simalarından biri, gözəl insan, görkəmli alim, bacarıqlı pedaqoq, əsl ziyalı Rəhim Əyyub oğlu Hüseynovun əziz xatirəsi onu tanıyan insanların qəlbində həmişə yaşayacaq.

"AZƏRBAYCAN" qəzeti 27 sentyabr 2012-ci il
"ELM" qəzeti 21 sentyabr 2012-ci il
" Bakı Universiteti" qəzeti 15 sentyabr 2012-ci il
" ŞUŞA" qəzeti 31 avqust 2012-ci il

Milli.Az
loading...

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.