Gələn il maaşlar artacaq?

"Minimum əməkhaqqı müəyyən edilərkən adətən inflyasiya, yaşayış xərcləri, orta əməkhaqqının səviyyəsi və artım tempi, əmək məhsuldarlığı, məşğulluq və ümumi iqtisadi vəziyyət nəzərə alınır".

Milli.Az unikal-a istinadən xəbər verir ki, bunu iqtisadçı Eldəniz Əmirov deyib. O bildirib ki, Azərbaycanda da 2027-ci il üzrə mümkün rəqəmi təxmin etmək üçün bu göstəricilərlə yanaşı, əvvəlki illərdə minimum əməkhaqqının necə artırıldığına, yəni, yanaşma təcrübəsinə baxmaq olar.

"Əvvəlcə əvvəlki təcrübəya baxaq. 2020 və 2021-ci illərdə minimum əməkhaqqı 250 manat olub. 2022-ci ildə 50 manat və ya 20%  artırılaraq 300 manata, 2023-cü ildə 45 manat və ya 15% artırılaraq 345 manata, 2025-ci ildə isə 55 manat və ya 15,9% artırılaraq 400 manata çatdırılıb. 2024 və 2026-cı illərdə artım olmayıb. Yəni, son üç artımın hamısı 15-20% intervalında olub. İndi isə orta aylıq əməkhaqqının ümumi dinamikasına baxaq. 2025-ci ildə ölkədə orta aylıq nominal əməkhaqqı 1102,9 manat olub. 2026-cı ilin yanvar-iyulunda bu göstərici artıq 1176,7 manata çatıb. 2027-ci il üçün isə 1288,3 manat proqnozlaşdırılır. Beləliklə, 2025-ci ilin faktiki göstəricisi ilə müqayisədə 2027-ci ildə orta əməkhaqqının təxminən 185 manat və ya 16,8% yüksək olacağı gözlənilir. Bu müqayisə minimum əməkhaqqı üzrə mümkün rəqəmi ehtimal etmək üçün ciddi əsasdır. Yəni, 2025-ci ilin faktiki göstəricisi ilə 2027-ci il üçün olan proqnozu müqayisə etdikdə orta aylıq əməkhaqqında 16,8% artım gözlənilir. Minimum əməkhaqqında da buna yaxın artım olarsa, 400 manat təxminən 465-470 manata yüksəlir. İnflyasiya tərəfdən baxdıqda isə bir qədər aşağı nəticə alınır. 2026-cı ilin yanvar-avqust aylarında illik inflyasiya 5,7% təşkil edib, 2027-ci il üçün isə orta illik inflyasiya 5,3% proqnozlaşdırılır. 

Bu göstəricilər minimum əməkhaqqının artımında yalnız inflyasiya amili əsas götürüldükdə, 450 manata yaxın rəqəmin mümkün ola biləcəyini göstərir. Beləliklə, iki fərqli göstərici bizə müəyyən interval verir. İnflyasiya üzərindən hesablama təxminən 450 manata, orta əməkhaqqının artım tempi isə 465-470 manata aparır. Eyni zamanda əvvəlki minimum əməkhaqqı artımların da 15-20% intervalında olması bu rəqəmin 2027-ci il üçün 460 manatı və daha yuxarı rəqəmləri dəstəkləyən əlavə göstəricidir".

İqtisadçı qeyd edib ki, 2027-ci ilin büdcə xərclərinin cəmi 1,7% artırılması ümumi maliyyə fonunun daha ehtiyatlı qurulduğunu göstərir: "Amma minimum əməkhaqqını birbaşa büdcə xərclərinin artım faizinə bağlamaq doğru olmaz. Bütün bunları birlikdə qiymətləndirdikdə mənim 2027-ci il üçün gözləntim minimum əməkhaqqının 450-470 manat intervalında müəyyənləşdirilməsidir. Bu interval daxilində isə 460 manat mənə daha real görünür. Bu isə 15% artım deməkdir və həm əvvəlki artımların aşağı həddinə, həm son iki ildə orta əməkhaqqının və qiymətlərin dəyişməsinə, həm də mövcud iqtisadi göstəricilərə yaxın nəticə verir. 470 manat variantının da kifayət qədər ciddi əsası var. Çünki minimum əməkhaqqı orta əməkhaqqı ilə eyni tempdə artırılarsa, hesablamanın özü təxminən bu rəqəmi verir. Bütün bunları nəzərə alaraq, mənim 2027-ci il üçün əsas proqnozum minimum əməkhaqqının 460 manat müəyyən edilməsidir. 470 manat da mümkün variantdır və əhalinin alıcılıq qabiliyyətinin qorunması, sosial dəstəyin gücləndirilməsi baxımından daha müsbət qərar olardı. 450 manatdan aşağı məbləğ isə arzuolunan deyil. Beləliklə, gələn il minimum əməkhaqqının 460 manat olmasını həm mövcud iqtisadi göstəricilər, həm də əvvəlki illərin artım təcrübəsi nəzərə alınmaqla mümkün variantlar arasında ehtimalı ən yüksək olan məbləğ hesab edirəm".

Müəllif: Malik Məlikov (Milli.Az redaktor)