Bu gün Azərbaycanda Milli Sevgililər Günüdür

30 iyun Azərbaycanda milli Sevgililər Günü kimi qeyd olunur.

Milli.Az xəbər verir ki, bu gün - 30 iyun həm də sevgi və şəhidliyin simvoluna çevrilmiş İlham və Fərizənin toy günüdür.

Onların taleyi bir sevda dastanı, bir vətən dərdi kimi yaddaşlara həkk olunub. 1990-cı ilin 20 Yanvar faciəsində şəhid olan İlham Allahverdiyev və onun ardınca öz canına qəsd edən həyat yoldaşı Fərizə Allahverdiyeva həm sevgiləri, həm də fədakarlıqları ilə tarixə düşüblər.

İlham Allahverdiyev 1962-ci ildə Ağdamda dünyaya göz açıb. Uşaqlıq illəri Ağdamda - nənəsinin yanında keçib. Sonra ailəsi ilə birlikdə Bakıya köçüb. Burada 54 saylı orta məktəbdə təhsilini davam etdirib. Hərbi xidmətdən sonra Bakıya qayıdaraq Gəmi Təmiri Zavodunda işə başlayıb. Məhz bu zavod bu gün onun adını daşıyır.

1989-cu ilin 30 iyununda İlham və Fərizə ailə həyatı qurublar. Toy günündə vağzalı sədaları altında Fərizə İlhamgilə köçüb. Qısa müddətdə birgə xoşbəxt həyat yaşasalar da, 1990-cı ilin yanvarında baş verən qanlı hadisələr bu sevgini yarımçıq qoydu. Yanvarın 19-da İlham həyat yoldaşının təhlükəsizliyini təmin etmək üçün onu valideynlərinin yanına aparır. Ardınca isə qara geyimlərini geyinib evdən çıxır və bir daha geri qayıtmır...

Həmin gecə İlham "20 Yanvar" dairəsi yaxınlığında sovet qoşunları tərəfindən açılan atəş nəticəsində şəhid olur. Onu ailəsi ertəsi gün xəstəxanalardan birində tapır. Əvvəlcə Xırdalandakı qəbiristanlıqda dəfn olunur, lakin daha sonra Şəhidlər Xiyabanında dəfn edilmək üçün oradan çıxarılır.

Bu acıya dözmək Fərizə üçün mümkünsüz olur. Əvvəlcə özünü yandırmağa cəhd edir, lakin qarşısı alınır. Ancaq qəti qərar vermişdi, İlhamı tək buraxmayacaqdı. Gecə hamı yuxuya getdikdən sonra bir qab sirkə içərək canına qəsd edir. Son məktubunu yazmağa çalışır, lakin göz yaşları içində yalnız bir-iki cümlə yazmağa gücü çatır.

Fərizə bətnindəki körpə ilə birgə İlhamın yanına - torpağa qovuşur...

Bu hekayə yalnız bir sevgi hekayəsi deyil, bu, Vətən uğrunda şəhid olmuş bir insanın və onu sonsuz məhəbbətlə sevən həyat yoldaşının əbədi məhəbbət salnaməsidir. Onlar Azərbaycan xalqının yaddaşında əbədiyaşar sevgilər kimi qalacaqlar.

Müəllif: Ülkər Vəliyeva (Milli.Az redaktor)