Çin mətbəxinin ləzzətli küçə yeməyi: Jianbing

Munq lobyası (yaşıl mərci) və unla hazırlanan axıcı xəmirin isti sac üzərində nazikcə açılaraq; yumurta, çörəkotu/küncüt, yaşıl soğan, fermentə edilmiş lobya sousu (tianmianjiang) və xırtıldayan wonton xəmiri (baocui) ilə büküldüyü bu yemək, Çin mətbəxinin ən populyar səhər yeməyi klassikidir.

Milli.Az xəbər verir ki, Fransız krepini xatırlatsa da, tərkibindəki un qarışığı və fərqli teksturaları ilə tamamilə özünəməxsus bir kimliyə malikdir.

Lazım olan ərzaqlar:
Xəmir üçün:

Yarım stəkan munq lobyası unu (tapılmasa, incə çəkilmiş yaşıl mərci unu)

Yarım stəkan buğda unu

1 stəkan soyuq su, yarım çay qaşığı duz

İçlik və montaj üçün:

2-3 ədəd yumurta

1 xörək qaşığı qara və ya ağ küncüt/çörəkotu qarışığı

3 sap yaşıl soğan (incə doğranmış), yarım dəstə təzə keşniş

2 xörək qaşığı Tianmianjiang (Çin şirin lobya sousu - alternativ olaraq Hoisin sousu)

1 çay qaşığı acı bibər yağı, 1 çay qaşığı Lao Gan Ma və ya sriracha sousu

4-5 ədəd kvadrat wonton xəmiri (və ya incə kəsilmiş milföy/loğma yuxası zolaqları)

Hazırlanması:
Çıtır qatın (Baocui) hazırlanması: Wonton xəmirlərinin ortasına bıçaqla iki paralel cızıq atın. Kiçik bir tavada yağı qızdırın və xəmirləri qızılı rəng alana qədər qızardıb kağız salfet üzərinə yığın.

Xəmirin hazırlanması: Dərin bir qabda unları və duzu qarışdırın. Suyu az-az əlavə edərək tel çırpıcı ilə tamamilə hamar, axıcı bir qıvam alana qədər çalın. Xəmiri 10 dəqiqə dinləndirin.

Bişirmə: Geniş, yapışmayan tavanı və ya krep sacını orta odda isidin. Tavaya çox az yağ çəkin. Xəmirdən bir böyük çömçə töküb, spatula vasitəsilə mərkəzdən xaricə doğru dairəvi hərəkətlərlə nazikcə yayın.

Yumurta və əlavələr: Krepin altı bərkidikdə, tam ortasına 1 yumurta sındırın. Spatula ilə yumurtanın sarısını partladaraq krepin üzərinə yayın. Yumurta hələ nəm ikən üzərinə yaşıl soğan, keşniş və küncüt qarışığını səpin.

Bükülmə: Yumurta qatılaşmağa başlayanda krepi ehtiyatla çevirin (yumurtalı hissə tavaya baxacaq). Üstdə qalan tərəfə fırça ilə sousları (Hoisin və acı yağ) çəkin.

Son toxunuş: Soslanmış hissənin tam ortasına hazırladığınız çıtır wonton xəmirini yerləşdirin. Krepin kənarlarını içəriyə doğru qatlayaraq düzbucaqlı bir "bohça" forması verin. Ortadan iki yerə bölüb isti-isti servis edin.

Nuş olsun!

Müəllif: Ülkər Vəliyeva (Milli.Az redaktor)