Zəlzələ mövzusunda kimə inanmalıyıq? - AÇIQLAMA

Son günlər mediada və sosial şəbəkələrdə zəlzələ "ekspertlərin"in proqnozları barədə bildirmək istəyirəm ki, Azərbaycan Respublikasının ərazisində zəlzələləri öyrənən, ərazilərin kompleks geogiziki-seysmoloji-geodinamik və geokimyəvi tədqiqatını aparan yeganə dövlət təşkilatı AMEA nəzdində Respublika Seysmoloji Xidmət Mərkəzidir.

Bunu Milli.Az-a açıqlamasında Azərbaycan Milli Elmlər Akademiyası (AMEA) nəzdində Respublika Seysmoloji Xidmət Mərkəzinin şöbə müdiri Vüsalə Rafiqqızı deyib.

Onun sözlərinə görə, hazırda  84 stansiya məlumatları ilə rəqəmsal seysmoloji, eləcə də respublika ərazindəki 300 -ə yaxın poliqonda il ərzində geofiziki və maqnitometrik, geokimyəvi, 24 GPS stansiya vasitəsi ilə geodinamik tədqiqatlar aparılır.

"Həmin tədqiqatların nəticəsi olaraq Azərbaycan ərazisinin seysmikliyi qiymətləndirilir. Onu da qeyd etmək istəyirəm ki, bu tədqiqatların nəticələri və təhlilləri mərkəzin müvafiq şöbələrində aparılır və biz hansısa fikir söyləyəndə alınmış nəticələrə istinad edirik".

V.Rafiqqızı bildirib ki, başqa təşkilatlarda bu işlər aparılmadığına, hətta hər hansı stansiya və sahə üzrə tətbiq olunan avadanlıqlar və cihazlar olmadığına görə elə mən də sual verirəm ki, ümumi fikirlərlə danışıb insanlarda narahatlıq yaratmağa çalışan, yaxud da maqnitudası 3 və ya ondan bir az çox olan zəlzələ baş verəndən sonra zəlzələ mövzusu ilə özünü gündəmə gətirməyə çalışan "ekspertlər" söylədikləri fikirləri hansı tədqiqatlara əsaslanır? Azərbaycan dövləti və Cənab Prezidentimizin daimi diqqəti və qayğısı sayəsində ölkəmizdə müasir seysmik stansiyalar şəbəkəsi qurulub.

"Cihaz və avadanlıqlar alınıb. Yüksək texnologiyalı emal proqramları tətbiq olunur bu sahədə. Seysmologiyada dəqiq proqnoz məsələsi bu gün bütün dünya seysmologiya elminin həll edə bilmədiyi sualdı. Ona görə də kiminsə çıxıb bu mövzuda "mən demişdim oldu, ya da olmadı"-kimi fikirlərlə çıxış etməsi həm elmi baxımdan əsassız fikirlərdir. Yeri gəlmişkən, bir fikri də əlavə edim ki, həmin "ekspertlər" 2025-ci ilin əvvəlində də ilin seysmik baxımdan aktiv olacağına dair "proqnozlar" vermişdilər. 2025-ci ildə isə Azərbaycan ərazisində həm baş verən zəlzələlərin zəif olması həm də aparılan digər tədqiqatların nəticəsi baxımdan  seysmiklik zəif oldu", - deyə şöbə müdiri qeyd edib.

Milli.Az