Avtomobillərin icbari sığorta haqları yeni qaydalarla hesablanacaq - Ətraflı VİDEOda

Oktyabrın 1-dən avtomobillərin icbari sığorta haqları yeni qaydalarla hesablanacaq.

Milli.Az Xəzər Xəbər-ə istinadən xəbər verir ki, yeni qaydalar ilə sığorta qanunvericiliyinə risk əsaslı sığorta haqqı hesablanması yanaşması gətirilir.

Yəni artıq avtomobili icbari sığorta etdirən zaman sürücünün yaşı, sürücülük təcrübəsi və avtomobilin istehsal ili əsas götürüləcək. Mühərrik həcminə görə müəyyən edilən baza sığorta haqları və avtonəqliyyat vasitəsinin növünə görə əmsallar isə dəyişməz olaraq saxlanacaq.

İcbari Sığorta Bürosunun icraçı direktoru Rəşad Əhmədov deyib ki, sığorta məbləği hesablanan zaman hətta avtomobilin ən çox hansı rayonda idarə olunacağı da əsas götürüləcək. Bu zaman avtomobilin rəsmi qeydiyyat yeri nəzərə alınacaq. Bakı şəhərində qəza riski çox olduğu üçün paytaxtda idarə olunan avtomobillərin baza sığorta haqları 1.1 əmsalına vurulacaq.

Sumqayıt və Abşeronda isə sığorta haqları hesablanan zaman baza sığorta məbləği 1.05 əmsalına, Naxçıvan və Gəncədə 1-ə, digər rayonlarda isə 0.95 əmsalına vurulacaq. Bundan başqa, sürücülük təcrübəsi 1 ildən az olan şəxslərdən isə sığorta haqqı 1.35 əmsalına vurularaq tələb olunacaq. Başqa sözlə, mühərrikinin həcmi 1500 kub/santimetr, 1 ildən az sürücülük təcrübəsi olan və Bakıda yaşayan şəxslərin avtomobilinin sığorta haqqı 67 manat 50 qəpik təşkil edəcək.

Bundan başqa, əgər avtomobilin istismar müddəti 10 ildən artıqdırsa, baza sığorta məbləği əlavə olaraq 1.05 əmsalına, 20 ildən artıq olduqda isə 1.1 əmsalına vurulacaq. Bütün hallarda risksiz sürücülər, xüsusilə də sürücülük təcrübəsi 7 ildən artıq olan şəxslər bonus sistemindən yararlanmaqla baza sığorta məbləğindən daha az sığorta ödənişi edəcəklər.

Rəşad Əhmədov həmçinin bir sıra sığorta şirkətlərinin son vaxtlar bəzi marka və modellərin sığortasında maraqlı olmaması ilə bağlı sualı da cavablandırıb. 

Dəymiş maddi zərərə görə avtomobil sahiblərinə ödənən maksimum 5 min manatlıq limit də artırıla bilər. Hazırda statistik rəqəmlər araşdırılır və bu təminatın artırılması üzərində iş gedir.

Yeni qaydalar əsasında dəymiş ziyanın ödənilməsinə noyabr ayının 1-dən başlanacaq.

Mövzu ilə bağlı daha ətraflı videomaterialı təqdim edirik:

Milli.Az