Gənc müğənni Zaur dükanında niyə şoka düşdü?

Azərbaycanın və Dağıstanın xalq artisti İlhamə Quliyevanın tələbəsi, gənc müğənni Zaur vətənə dönən kimi yaradıcılıq işlərinə başladı. Milli.az xəbər portalının məlumatına görə, müğənni Türkiyədə olduğu zaman yaradıcılıq işlərində fasilə verməyib və yeni, "Xoşbəxtliyin rəngini çək" adlı klip çəkdirib. Sözləri və musiqisi Xanım İsmayılqızına məxsus olan mahnıya çəkdirdiyi klipi o, dünən mətbuat nümayəndələrinə təqdim etdi. Onu təbrik etmək üçün xalq artisti Faiq Ağayev, əməkdar artist Elza Seyidcahan, müğənni Rəqsanə, Sevinc Musayeva, Yaşar, bəstəkar Xanım İsmayılqızı gəlmişdilər.

Gözümüzə dəyməyən bircə Zaurun müəlliməsi, xalq artisti İlhamə Quliyeva oldu.  Bəs görəsən İlhamə xanım niyə tələbəsinin həm yeni klipini həm də artıq biznesmen olmağını təbrik etməyə gəlmədi. Bu suala cavab axtarsaq da, tapmadıq.

Lakin bu təqdimat müğənniyə yaman baha başa gəldi. Belə ki, o, klipini hər kəs kimi mətbuat konfransında yox, yeni acdığı geyim dükanında təqdim etdi. Bir güllə ilə iki quş vurmaq istəyən Zauru təbrik etmək üçün gələn  qonaqlar isə bu fürsətdən olduqca faydalandılar və yeni açılmış "Zeta Mondo"  dükanında olan geyimləri özləri üçün hədiyyə götürdülər. Dükanı sözün əsl mənasında "sökən" qonaqlar müğənnini şoka saldılar. Çantalarını yeni geyimlərlə dolduran insanlar dükandan əsər-əlamət qoymayıb, məkanı tərk etdilər. Onların sırasına həmçinin dəvət alan müğənnilər də daxildirlər. Bu işdə isə ən fəal Rəqsanənin prodüseri Təranə Səmədova oldu. Faiq Ağayeva isə onu qeyd etdi ki, onun əyninə olan geyimlər hər zaman azlıq təşkil etsələr də, bu dükanda o, öz "razmerini" tapdı.

Tortu kəsən müğənnilər Zauru olduqca təriflədilər. Faiq Ağayev isə  qeyd etdi ki, Zaur çox məsuliyyətli insandır: " Düzdür, mən Zauru İlhamə xanım Quliyevanın vasitəsi ilə tanımışam. Amma onu deyə bilərəm ki, o, çox vasvası oğlandır. Yəni seçicidir , hər şeyi bəyənmir. Amma sevinirəm ki, o, buranı nəhayət ki, bəyəndi. Onun alnının tərinə fikir verin, bu məsuliyyətdən irəli gəlir. Ona uğurlar arzu edirəm. Amma bir sevindirici hal budur ki, Zaurun da boyu mənim kimi balacadır. Demək biz burdan asanlıqla özümüzə geyim seçə bilərik" (gülür).

Xalq artistinə "Siz də biznesmen olmaq istəyərsinizmi?" sualını ünvanlayanda o, belə cavab verdi: "Mən Allahıma çox şükür edirəm ki, belə bir dükanım olmasa da, sənətimlə dolanıram. Əgər mən bu gün burada iştirak edən dostlarımın ad günlərində sanballı hədiyyələr alıb, istədiyim kimi yaşaya bilirəmsə, bu mənə bəsdi".

Onun sözünü kəsən müğənni Elza Seyidcahan isə Faiq Ağayevi məhz öz peşəsi ilə biznesmen olduğu qeyd edərək bildirdi ki, çoxların özünü məhz Ağayevə bənzətsələr də, onun yerişini təkrarlaya bilmirlər.

Mələk
Milli.az