Moskvada azərbaycanlı iş adamının ofisinə hücum: Milyarder Bakıya gəldi - YENİLƏNİB - FOTO

00:44

"Rusiyanın neft məhsullarını daşıyan "Railgo" şirkətində axtarışların aparılması barədə məlumat doğrudur".

Milli.Az xəbər verir ki, bu barədə axar.az-a insidentlə bağlı ətraflı məlumatı olan mənbə məlumat verib.

Onun sözlərinə görə, İsgəndər Xəlilovun oğlu Rəhman Xəlilovun adına olan "Railgo"nun Lujniki ərazisindəki ofisinə xüsusi təyinatlılar və müstəntiqlər basqın ediblər, sənədlər müsadirə olunub və işçilərə təzyiq göstərilib. Buna baxmayaraq, İsgəndər Xəlilov şəxsi əlaqələrindən istifadə edərək problemin müvəqqəti həllinə nail olub.

Mənbə bildirib ki, Xəlilovlar buna görə məlumatı təkzib etməyi məqsədəuyğun sayırlar.

Həmçinin vurğulanıb ki, İsgəndər Xəlilov və ailə üzvləri hazırda Azərbaycandadırlar, yalnız ailənin kiçiyi Rauf Xəlilov Moskvada qalıb.

----------
18:50

Rusiyanın "Railgo" şirkəti ofislərində axtarış aparılması ilə bağlı məlumatları təkzib edib.

Şirkətdən APA-ya bildirilib ki, bu gün - 25 iyul 2025-ci il tarixində "Railgo"nun ofisində iş adi ştat rejimində aparılıb.

Eyni zamanda, qeyd edilib ki, şirkətlə bağlı heç bir əməliyyat-istintaq tədbiri keçirilməyib.

-------------
16:55

Rusiyanın paytaxtı Moskvada neft məhsullarının daşınması ilə məşğul olan "Railgo" şirkətində hüquq-mühafizə orqanları tərəfindən axtarış aparılıb.

Milli.Az xəbər verir ki, yerli KİV-lərin yaydığı məlumata görə, bu gün səhər saatlarında şirkətin Lujniki rayonunda yerləşən ofisinə xüsusi təyinatlı qüvvələr və əməliyyatçılar daxil olub. Əməliyyat zamanı bir sıra sənədlər müsadirə olunub və əməkdaşların binanı tərk etməsinə müvəqqəti icazə verilməyib.

Qeyd edək ki, "Railgo" şirkəti Azərbaycan əsilli iş adamı Rəhman Xəlilova məxsusdur. Şirkət əsasən neft və neft məhsullarının, o cümlədən Azərbaycanın enerji resurslarının Qara dəniz vasitəsilə tranzit daşınması ilə məşğuldur.

Hazırda axtarışların səbəbləri və istintaqın detalları barədə rəsmi açıqlama verilməyib.

Kənan
Milli.Az