"Bu iki tarixi günün dəyişdirilməsi gələcək qarşısında məsuliyyətimizdir" - DEPUTAT ŞƏRH ETDİ

"Azərbaycan Prezidenti İlham Əliyevin təqdimatı əsasında 28 may tarixinin Müstəqillik Günü, 18 oktyabr tarixinin isə xalqımızın Müstəqilliyinin bərpası günü kimi qeyd edilməsi tarixi addımdır. Bununla biz tarixi varidatımızın düzgün dəyərləndirilməsinin nə qədər vacib olduğunu ifadə etmiş oluruq".

Milli.Az SİA-ya-a istinadən bildirir ki, bu sözləri  açıqlamasında deputat Sevil Mikayılova deyib.

Onun sözlərinə görə, 1918-ci il 28 may tarixində Azərbaycan xalqı müstəqillik salnaməsini yaratdı: "İlk dəfə olaraq müsəlman şərqində demokratik quruluşlu dövlət elan olundu. O dövrdə Azərbaycanda formalaşmış demokratik düşüncəli ziyalı sinfi xalqı irəliyə apararaq tarixi köklərə, qədim dövlətçilik ənənələrinə əsaslanaraq yeni dəyərlər yaratdı. Onlar bütün dünyaya şərqin və qərbin qovuşuğunda, sözün əsl mənasında, hər iki sivilizasiyanın dəyərlərini özündə birləşdirən dünyəvi bir dövlət təqdim etdilər. Azərbaycan Demokratik Respublikası müstəqillik tariximizin parlaq səhifəsini yazdı. O, bir çox ilklərə imza atmaqla dövrünün ən cəsarətli siyasi düşüncə tərzini dövlətçilik platformasına uğurla transformasiya etdi. Şərqdə ilk Parlamentin yaradılması, bu məsələdə bir çox dövlətləri geridə qoyaraq qadınlara seçki hüququnun verilməsi fəxr edəcəyimiz tarixdir".

Deputat fikirlərinə davam edərək həmçinin qeyd edib ki, biz müstəqillik tariximizə sahib çıxırıq və onu yaşadanlar qarşısında hər zaman mənəvi borcumuzu dərk edəcəyik: "Müstəqil dövlətimizi 1918-ci ildə yaratdıq. Nəsildən nəsilə qürurla ötürülən bu miras 1991-ci il oktyabrın 18-də elan olunmuş müstəqillik aktı ilə bir daha öz təsbitini tapdı. Tarixi ədalət bərpa olundu. Oktyabrın 18-də müstəqilliyimizi yenidən qazandıq və 1918-ci il mayın 28-də yaradılmış dövlət yenidən dünyanın siyasi xəritəsində müstəqil olaraq parladı - bayrağımız, gerbimiz, himnimiz yenidən bərpa etdiyimiz müstəqil dövlətin simvolları oldu. Ulu öndər Heydər Əliyev tərəfindən möhkəmləndirilən müstəqilliyimiz Azərbaycan Prezidenti, Ali Baş Komandan İlham Əliyevin rəhbərliyi altında əbədiyyətə çevrildi. Bu gün biz ən qürurlu tariximizi yaşayır, yaradırıq. İşğaldan azad edilən torpaqlarla Azərbaycan bütövləşdi. Üçrəngli bayrağımız vətən torpağının hər qarışında qürurla dalğalanır. Müstəqil Azərbaycanın Zəfər salnaməsini yaratmış müzəffər Ali Baş Komandan İlham Əliyevin rəhbərliyi altında dövlətimiz tarixin bütün sınaqlarından alnı açıq çıxaraq işıqlı gələcəyini təmin edib. Bu baxımdan 28 may tarixinin Müstəqillik Günü, 18 oktyabr tarixinin isə Xalqımızın Müstəqilliyinin Bərpası Günü kimi qeyd edilməsi keçmişə minnətdarlığımız, gələcək qarşısında məsuliyyətimizdir".

Milli.Az