Siyasət

Müxalifət partiyası mitinq keçirməkdə israrlıdır

30 Aprel 2010 11:32
Baxış: 221
"Ümid" Partiyası 1 may tarixinə planlaşdırdığı kütləvi aksiyanı təxirə salıb. Bu barədə Milli.Az xəbər portalına partiyanın sədri, millət vəkili İqbal Ağazadə bildirib.

Onun sözlərinə görə, partiyanın Rəyasət Heyətində mayın 1-nə təyin olunan mitinqlə və Bakı Şəhər İcra Hakimiyyətinin (BŞİH) cavab məktubu ilə bağlı müzakirələr olub. "Mitinq üçün ayrılan yerlər bizi qane etmədiyi üçün aksiyanı təxirə saldıq. Gələn həftə biz yenidən eyni məqsədlə Bakı Şəhər İcra Hakimiyyətinə müraciət edəcəyik" - deyə partiya sədri bildirib.

Qeyd edək ki, Ümid Partiyası mitinq üçün üç yerdən birini istəmişdi: Füzuli meydanı, "Nərimanov" kinoteatrının qarşısı və ya Ukrayna dairəsi. BŞİH isə cavab məktubunda mitinqin yalnız bu yerlərdən birində keçirilməsini mümkün sayıb: Binəqədi qəsəbəsi idman-sağlamlıq kompleksinin stadionu, 20-ci yaşayış sahəsi, Elçin Əzizov küçəsində yerləşən sürücülük məktəbinin həyətindəki meydança və ya Zığ yolu küçəsi, 29/22-ci məhəllə ilə üzbəüzdəki meydança.

İ.Ağazadə onu da əlavə edib ki, əgər növbəti dəfə də onlara kütləvi aksiya üçün qaneedici yer ayrılmasa, Rəyasət Heyətində aksiyanın icazəsiz, yoxsa BŞİH-in ayırdığı yerlərdən birində keçirilməsini müzakirə edib, müvafiq qərar qəbul edəcəklər.

Digər siyasi qüvvələrlə birgə kütləvi aksiyaların keçirilməsinə gəldikdə isə partiya sədri hələlik bu təkliflə heç kimə müraciət etmədiklərini, amma aktual olacağı təqdirdə, edəcəklərini söyləyib.

Yaşar
Milli.Az

 

Azernews Newspaper

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.