Siyasət

Azərbaycan Respublikasının Avropa Şurasında üzvlüyünün 20 illiyi Strasburqda qeyd olunub - FOTO

26 Yanvar 2021 07:25
Baxış: 382

2021-ci il 25 yanvar tarixində Azərbaycan Respublikasının Avropa Şurasına üzvlüyünün 20 ilinin tamam olması münasibətilə Strasburqda, ölkəmizin bu təşkilat yanında daimi nümayəndəliyində tədbir keçirilib.

Milli.Az Trend-ə istinadən bildirir ki, Avropa Şurasının Parlament Assambleyasındakı (AŞPA) nümayəndə heyətimizin üzvlərinin iştirakı ilə baş tutan bu tədbiri Azərbaycanın Avropa Şurası yanında daimi nümayəndəliyinin rəhbəri Fəxrəddin İsmayılov açaraq, ilk əvvəl iştirakçıları 44 günlük Vətən müharibəsi və eləcə də birinci Qarabağ müharibəsində canlarını fəda etmiş qəhrəman şəhidlərimiz, habelə 20 Yanvar qurbanlarının əziz xatirəsini bir dəqiqəlik sükutla yad etməyə dəvət edib.

Çıxışında ölkəmizi Avropa Şurasına aparan yolun qısa tarixçəsinə toxunan F.İsmayılov bu yolda üzləşdiyi maneələrə rəğmən, Ulu öndər Heydər Əliyevin müdrik və qətiyyətli mövqeyi sayəsində Respublikamızın 2001-ci ildə Avropa Şurasına qəbul edilməsinə nail olunduğunu bildirib. Daimi nümayəndə vaxtaşırı olaraq ikili standartlarla üzləşən Azərbaycanın Avropa Şurası daxilindəki münasibətlərin qarşılıqlı hörmət və dialoq üzərində qurulmasının vacibliyinə inandığını ifadə edib. O, 2001-ci ildə Ermənistanla birgə Avropa Şurasına qəbul edilən zaman Azərbaycanın Avropa qitəsinin bu mötəbər təşkilatının işğal altında olan torpaqlarımızın azad edilməsinə yardımçı olacağına dair böyük ümidlər bəsləndiyini xatırladıb, lakin bu ümidlərin özünü doğrultmadığını qeyd edib. F.İsmayılov sonunda müzəffər Ali Baş komandan İlham Əliyevin rəhbərliyi altında Azərbaycanın rəşadətli silahlı qüvvələri tərəfindən haqq-ədalətin bərpa edildiyini vurğulayıb və artıq işğaldan azad Azərbaycan üçün beynəlxalq aləmdə, o cümlədən Avropa Şurası çərçivəsində yeni bir dönəmin başlandığını bildirib.

Daha sonra AŞPA-da nümayəndə heyətinin rəhbəri, Milli Məclisin Beynəlxalq münasibətlər və parlamentlərarası əlaqələr komitəsi sədri Səməd Seyidov çıxış edərək, Avropa Şurasına üzvlüyümüzün 20 ili ərzində formalaşmış münasibətlər haqqında danışıb. Ümummilli lider Heydər Əliyevin iştirakı ilə 2001-ci ildə təşkilatın mənzil-qərargahı qarşısında Azərbaycan bayrağının qaldırılması ilə bağlı tarixi mərasimin canlı şahidi kimi qeydlərini bölüşən S.Seyidov 20 il öncə Ermənistanın işğalı ilə əlaqədar Azərbaycanın Avropa Şurasına ağrı ilə, amma eyni zamanda ümidlərlə gəldiyini söyləyib. Buna baxmayaraq, ölkəmiz illər boyu qeyri-obyektiv mövqe və ikili standartlarla qarşılaşıb. O qeyd edib ki, Azərbaycanın ərazi bütövlüyünün bərpası hər birimizin böyük arzusu olub və bu arzu millətin iradəsini əks etdirən və onu bir yumruqda birləşdirən, milli maraqları ən ali maraq kimi müdafiə edən lider, Azərbaycan Respublikası Prezidenti İlham Əliyevin sayəsində reallaşıb. S.Seyidov ərazi bütövlüyünü bərpa etmiş bir ölkənin nümayəndə heyəti üzvləri olaraq, AŞPA-nın qış sessiyasına gəlməkdən böyük qürur və fəxr hissi keçirdiklərini vurğulayıb.

Avropa Şurasına üzvlüyümüzün ilk günlərindən AŞPA-da nümayəndə heyətimizin tərkibində olmuş millət vəkili Rafael Hüseynov çıxışında ötən dövrlə bağlı xatirələrini bölüşüb və xüsusilə üzvlüyə qəbul edilməyimiz ərəfəsində Ümummilli lider Heydər Əliyevin Avropa Şurası rəsmiləri ilə görüş və müzakirələrindən bir sıra tarixi məqamlara diqqət yetirib. O, vaxtilə AŞPA-da nümayəndə heyətimizin başçısı olmuş, Prezident İlham Əliyevin rəhbərliyi altında görülən işlər və əldə olunan nailiyyətlərə nəzər salıb və hazırkı heyətin də məhz onun müəyyən etdiyi xətt üzrə fəaliyyətini davam etdirdiyini söyləyib. Millət vəkili Avropa Şurasına üzvlüyün 20 illiyini önəmli bir tarix kimi xarakterizə edib və bu illər ərzində ölkəmizin əldə etdiyi tərəqqini çox yüksək qiymətləndirib.

Milli.Az

Məqaləyə dair fotomateriallar:

 

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.