Siyasət

"Ermənistanın razılaşmaya əməl etməkdən başqa yolu yoxdur" - Deputat

14 Yanvar 2021 17:49
Baxış: 502

30 ilə yaxın davam edən Ermənistan-Azərbaycan Dağlıq Qarabağ münaqişəsi Ali Baş Komandanın rəhbərliyi altında şanlı Azərbaycan Ordusu tərəfindən həll edildi. Ərazilərimizin işğaldan azad edilməsi regionda tamamilə yeni mənzərə yaratdı.

Milli.Az bildirir ki, bunu Trend-ə Milli Məclisin deputatı Şahin İsmayılov deyib.

Deputat bildirib ki, Azərbaycanın ərazi bütövlüyünü bərpa etməsi bu bölgə üçün yeni çağırışlar yaratdı. O qeyd edib ki, bundan sonrakı mərhələdə bölgədə sülhə dəstək vermək və iqtisadi prosesləri sürətləndirmək bütövlükdə Cənubi Qafqaz regionu üçün faydalı olacaq:

"Onsuz da əvvəlki dövrlərdə bölgədəki nəhəng layihələrin icrası birbaşa Azərbaycanın iradəsindən asılı idi. Müharibədən qalib çıxmağımız isə bu mövqeyimizi daha da gücləndirdi. Düşünürəm ki, bu vəziyyət hər kəsə, o cümlədən ermənilərə də kifayət qədər aydındır. Əfsuslar olsun ki, Ermənistanın bəzi siyasi dairələri və ənənəvi türk düşmənçiliyi mövqeyi tutan təşkilatları region üçün yaranmış yeni reallıqları sanki görmür, imzalanmış sənədlərin icrasından yayınmaq istəyirlər.

İmzalanmış sənədlərdən imtina etmək Ermənistanın bir dövlət kimi mövcudluğunu sual altına qoya bilər. Onsuz da iqtisadiyyatı demək olar ki, məhv olmuş bu dövlətin çox ciddi problemləri var. Əhalinin həyat səviyyəsi hər keçən gün ağırlaşır. Gənclər Ermənistanı tərk etməyin yollarını axtarırlar və.s. Bütün bunların fonunda isə yenidən əsassız iddialarla razılaşmadan yayınmaq cəhdləri özünəqəsdə bərabərdir".

Ş.İsmayılov vurğulayıb ki, Ermənistan nə qədər tez yaranmış yeni reallıqları qəbul etsə bu, elə ən çox onlara fayda verəcək:

"Bunun isə çox sadə yolu var, düşünməyi bacarmaq və ənənəvi türk düşmənçiliyindən imtina etmək. Zaman artıq bizim xeyrimizə işləyir. Ermənistanın normal gələcəyi birbaşa olaraq onun öz qonşuları ilə münasibətlərindən asılıdır. Ona görə də nə Ermənistan üçün imzalanmış sənədlərə əməl etmək yeganə qurtuluş yoludur".

Milli.Az

 

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.