Siyasət

Rəbiyyət Aslanova: “Bəzi beynəlxalq təşkilatlar Azərbaycandakı durumu düzgün qiymətləndirmirlər”

21 Aprel 2011 16:09

Baxış: 193

#AZERBAİJAN

"Bəzi beynəlxalq təşkilatların ölkəmizdəki proseslərlə bağlı münasibəti gerçəkliyi əks etdirmir. Təbii ki, belə münasibət Azərbaycan vətəndaşlarının narazılığına səbəb olur". Milli.Az xəbər portalının məlumatına görə, bunu yap.org.az saytına açıqlamasında Milli Məclisin İnsan hüquqları komitəsinin sədri Rəbiyyət Aslanova Avropa İttifaqının rəsmi şəxslərinin Azərbaycanda ifadə azadlığının və sərbəst toplaşmaq hüququnun məhdudlaşması ilə bağlı fikirlərinə münasibət bildirərkən deyib. R.Aslanova qeyd edib ki, Azərbaycanda insan hüquqlarının qorunması, ifadə və söz azadlığının təmin olunması məsələsində heç bir problem yoxdur. Onun sözlərinə görə, bu hüquqlar müvafiq qanunvericilikdə öz əksini tapıb.

"Xüsusilə qeyd etmək lazımdır ki, Azərbaycanın bu məsələlərlə bağlı milli qanunvericiliyi Avropa standartlarına uyğundur. Həmin sənədlər Avropa Şurasının Venesiya komissiyasının ekspertizasından keçərək müsbət rəy alıb. Bu baxımdan, ölkəmizdə ifadə, söz azadlığı və sərbəst toplaşmaq hüququ ilə bağlı qanunlar beynəlxalq konvensiyaların müddəaları ilə tam səsləşir. Ona görə də, əminliklə demək olar ki, Azərbaycanda söz, ifadə azadlığının təmin olunması üçün bütün şərait və şərtlər var" - R.Aslanova vurğulayıb.

Komitə sədri bildirib ki, bəzi beynəlxalq təşkilatlar isə ölkəmizdə olan mövcud durumu düzgün qiymətləndirmirlər: "Həmin təşkilatlar Azərbaycanda həyata keçirilən demokratik islahatların mahiyyətini düzgün qiymətləndirməyərək ölkəmizdə problemlərin olduğunu iddia edirlər. Əlbəttə ki, bunların heç biri gerçəkliyə uyğun deyil. Bu baxımdan, Avropanın nüfuzlu qurumlarının bu cür münasibət bildirmələri çox təəssüfedicidir".

Milli.Az

Milli.Az - Xəbər Portalı

Rəbiyyət Aslanova: “Bəzi beynəlxalq təşkilatlar Azərbaycandakı durumu düzgün qiymətləndirmirlər”

DİGƏR XƏBƏRLƏR

XƏBƏR LENTİ

TOP VIDEO

SORĞU

2026-cı ildən gözləntiləriniz nələrdir?