Siyasət

Ceyhun Bayramov Qazaxın 4 kəndinin qaytarılmasından danışdı

30 May 2024 13:16
Baxış: 547

Qazaxın uzun müddət Ermənistan işğalı altında qalan 4 kəndinin Azərbaycana qaytarılması vəziyyətin normallaşması prosesinə müsbət töhfə verir.

Milli.Az Trend-ə istinadən bildirir ki,  bu barədə Azərbaycanın xarici işlər naziri Ceyhun Bayramov İslamabadda Pakistan baş nazirinin müavini və xarici işlər naziri Məhəmməd İshaq Darla mətbuat konfransında deyib.

Nazir qeyd edib ki, Pakistanın Ermənistan-Azərbaycan münaqişəsi, 44 günlük Vətən Müharibəsi zamanı və ondan sonra Azərbaycana göstərdiyi qətiyyətli siyasi və mənəvi dəstəyi ölkəmiz daima yüksək qiymətləndirib.

"Cammu və Kəşmir məsələsində də bizim mövqeyimiz daima müvafiq şəkildə olub. Azərbaycan bu problemin beynəlxalq hüququn norma və prinsipləri, həmçinin, BMT Təhlükəsizlik Şurasının müvafiq qətnamələri əsasında, habelə beynəlxalq hüquqa tam hörmətlə yanaşmaqla, sülh yolu ilə həllini dəstəkləyir. Bu gün həmkarıma regionumuzda münaqişədən sonrakı vəziyyət, Azərbaycanın işğaldan azad edilmiş ərazilərində bərpa və yenidənqurma işləri barədə məlumat verdim.

Azərbaycan və Ermənistan arasında sərhədin müəyyən hissəsinin delimitasiyası və uzun müddət Ermənistan işğalı altında qalan kəndlərin Azərbaycana qaytarılması ilə bağlı son razılaşma vəziyyətin normallaşması prosesinə müsbət töhfə verir. Azərbaycan sülh prosesinə sadiqdir və ümid edirik ki, bu, bütün ölkələr üçün firavan və təhlükəsiz regionun yaradılmasına müsbət nəticələr verəcək", - nazir deyib.

Qeyd edək ki, 15 may 2024-cü il tarixində Azərbaycan Respublikası və Ermənistan Respublikası arasında sərhəddə Komissiyaların növbəti 9-cu görüşü keçirilmiş, sözügedən Texniki Protokol razılaşdırılmış və bu barədə Komissiyaların müvafiq Protokolu imzalanıb.

Delimitasiya işləri nəticəsində 12,7 km uzunluğunda sərhəd xətti müəyyən edilmiş və bununla Azərbaycan Respublikasının Qazax rayonunun 4 kəndinin: Bağanıs Ayrım, Aşağı Əskipara, Xeyrımlı və Qızılhacılının ərazilərinin (6,5 km2) Azərbaycana qaytarılması təmin edilib.

Mayın 24-də Azərbaycan Respublikasının Qazax rayonunun Bağanıs Ayrım, Aşağı Əskipara, Xeyrımlı və Qızılhacılı kəndlərinin əraziləri Azərbaycan Respublikası Dövlət Sərhəd Xidməti tərəfindən nəzarətə götürülüb.

Milli.Az
Xəbərlərimizi WhatsApp kanalımızAdan da oxuyun

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.