Azərbaycan ətrafında böyük oyun – ABŞ-ın hədəfi bəlli oldu

ABŞ Rusiyanı bölgədən sıxışdırıb çıxarmaq üçün Cənubi Qafqazda irimiqyaslı oyuna girib.

Milli.Az teleqraf.com-a istinadən bildirir ki, bunu politoloq İlqar Vəlizadə deyib.

"ABŞ dövlət katibinin köməkçisi Ceyms Obraynın ziddiyyətli bəyanatları və Senatın Azərbaycana hərbi yardımı qadağan edən aktı qəbul etməsi fonunda Amerika diplomatiyasının Cənubi Qafqazdakı fəaliyyəti belə bir fikrə əsas verir ki, Vaşinqton regionda öz şərtləri ilə sülh axtarır, bunu açıq israrla edirlər. Obrayn noyabrın 27-də sülh müqaviləsinin hazırlanması prosesinə baxışı ilə bağlı növbəti açıqlamanı verdikdən sonra ABŞ dövlət katibi Entoni Blinken Azərbaycan Prezidenti İlham Əliyev və Ermənistan Baş naziri Nikol Paşinyana zəng etdi. Rəsmi mesajların sətirlərindən söhbətlərin tonu və xarakterini müyyən etmək çətindir. Amma bütün konteksti, ən əsası Amerikanın söz və davranışlarını təhlil edəndə məlum olur ki, Vaşinqton danışıqlar prosesini tələsdirir və bunun öz şərtləri əsasında baş tutmasını istəyir", - ekspert bildirib.

Onun sözlərinə görə, ABŞ-dan birbaşa danışıqların dəstəklənməsinə dair bəyanatlar çaşdırıcı olmamalıdır, çünki dərhal Azərbaycana yönəlik regional kommunikasiyaların güc yolu ilə açılmasının yolverilməzliyi barədə xəbərdarlıqlar eşidilir:

"Vaşinqton heç kimin Ermənistan ərazisinə hücum etməyəcəyi və ya kommunikasiyaların zorla açılmayacağı barədə Bakıdan dəfələrlə verilən bəyanatlara açıq şəkildə inanmır.

Xüsusən də həmin Obrayn kommunikasiyaların blokadadan çıxarılması perspektivindən danışarkən bildirib ki, Bakı qeyri-sülh yolu ilə öz məqsədinə çatmaq istəsə, ABŞ bunun qarşısını almaq üçün mümkün vasitələrdən istifadə etməli olacaq. Amerika rəsmisinin açıqlaması çox maraqlıdır: "Biz tərəflərə nə gözlədiyimizi və fərqli irəliləyişin nəticələrini çox aydın şəkildə izah etmişik".

Yəni Amerika tərəfi danışıqlardan hansı nəticələr gözlədiyini və hansı ssenarinin onun üçün arzuolunmaz olacağını açıq formada dilə gətirir. Belə təəssürat yaranır ki, Vaşinqton tərəflər arasında birbaşa danışıqların mümkünlüyündən danışanda özünü birbaşa iştirakçı və öz hərəkətləri ilə danışıqlar prosesinə təsir edə bilən tərəf hesab edir".

İlqar Vəlizadə Azərbaycanın onunla təhdid dili ilə danışmaq istəyənlərə verdiyi mesajlara da diqqət çəkib:

"Bakı dəfələrlə açıq şəkildə bəyan edib ki, təhdid və xəbərdarlıqlar sülh və etimaddan danışmaq üçün ən yaxşı yol deyil. Xüsusən də Vaşinqton hələ də vasitəçi olduğunu iddia edirsə. Maraqlıdır ki, ABŞ həmişə Ermənistanın ərazi bütövlüyünə sadiqliyindən, hətta maraqlarının qorunmasından danışarkən, Azərbaycan ərazilərinin Ermənistan tərəfindən işğalı zamanı həmin vurğunu etməyib. İndi - Azərbaycanın eksklavlarının faktiki olaraq Ermənistanın nəzarəti altında olduğu vaxtda ABŞ heç nə baş vermədiyini iddia etməyə üstünlük verir və Ermənistandan Azərbaycanın ərazi bütövlüyünə təhlükə ilə bağlı narahatlığı barədə danışmağa ehtiyac duymur.

ABŞ-ın Ermənistanın ərazi bütövlüyü ilə bağlı belə canfəşanlıq göstərməsi fonunda Ermənistanın KTMT-dəki müttəfiqlərindən, xüsusən də Rusiyadan hansısa təşviş xarakterli bəyanatların olmaması da az maraq kəsb etmir. Moskvanın Azərbaycanın yaratdığı "təhlükə"ni neytrallaşdırmaqda "acizliyini və bunu istəmədiyini" göstərmək üçün aşkar hesablama aparılır. Rusiyanı sıxışdırıb sıxışdırmaq üçün regionda növbəti, daha irimiqyaslı oyuna girən Vaşinqton üçün bu, vacib oyundur. Fakt budur ki, bunu regional aktorların əli ilə aparmaq cəhdi, bir qayda olaraq, nə sülhə, nə də sabitliyə yaxşı nəsə gətirir".

Milli.Az