İrəvandan İKİTİRƏLİK - Paşinyan yenə Bakının səbrini sınayır?

"Ermənistanla Azərbaycan arasında danışıqlar prosesi bu və ya digər şəkildə gedir. Hər halda sülh razılığı ilə bağlı bu danışıqlar dayanmır, dayanmadan davam edir. Tərəflər müəyyən ortaq məxrəcə gəlmək niyyətindədirlər".

Bunu Milli.Az-a açıqlamasında "Cənubi Qafqaz" politoloqlar klubunun rəhbəri İlqar Vəlizadə deyib.

O bildirib ki, Paşinyan sülh sazişinə təzadlı və zərərli açıqlamalar verməklə ölkəsindəki iğtişaşları bir qədər səngitmək istəyir:

"Azərbaycanla paralel olaraq eyni zamanda Türkiyə-Ermənistan danışıqları da aparılır. Bu istiqamətdə də müəyyən ilkin nəticələr var. İndi bu nəticələri hər iki tərəf məlum səbəblərə görə açıqlamırlar, amma görünən odur ki, artıq müəyyən nəticələr var. Bunun fonunda revanşistlərin, "Qarabağ klanı"nın iştirakı ilə aksiyalar keçirilir. Onun arxasında dayanan diaspora nümayəndələrinin, bəzi siyasi qrupların, müxtəlif ölkələrin - Qərbin, Rusiyanın müxtəlif dairələrinin nümayəndələri də burada öz məqsədlərini güdərək bu iğtişaşlardan istifadə etmək istəyirlər.  

İğtişaşlara gəldikdə, deyə bilərik ki, onun aparıcı qüvvəsi olan köhnə iqtidarın rəhbərləri Sarkisyan-Köçəryan tandemidir, eyni zamanda "Daşnaksutyun" partiyasıdır, onun fəallarıdır. "Daşnaksutyun" Amerika, Fransa erməniləri ilə sıx bağlı olan təşkilatdır. Onlardan eyni zamanda maliyyə dəstəyi alır. Məqsəd Paşinyanı devirmək və hakimiyyəti ələ almaqdır. Beləliklə, indiki yeni situasiyada köhnə üsullarla Ermənistanı idarə etmək idi və yaxud da ki, köhnə gündəliyi indiki gündəmə salmaqdan ibarətdir. 

"Status" məsələsi, Qarabağın "müstəqilliyi" kimi yersiz və dəxilsiz şüarları səsləndirməklə onlar bu köhnə gündəliyi gündəmə gətirmək istəyirlər. Əlbəttə, digər məqsəd də ondan ibarətdir ki, həmin bu ölkələri, xüsusilə də Rusiyanı, Fransanı Azərbaycana qarşı yönəltsinlər və burada bir "rıçaq" rolunu oynasınlar. 

Sərhəddəki silahlı insident kimin sifarişidir?

Ermənistan ordusunda Köçəryanla, Sarkisyanla bağlı olan insanlar kifayət qədərdir. Baxmayaraq ki, orduda müəyyən təmizləmə işləri aparılır və bu ordu 30 il ərzində qurulub və onun qurucuları S.Sarkisyan, R.Köçəryan, S.Ohanyan və digər quldurlardır. Orduda bu quldurların adamları hələ də var və onlar da ara bulandırırlar, təxribatlarla məşğuldurlar. 

İndiki iqtidar orduya kifayət qədər nəzarət edə bilmir. Nəzarət etsəydi nizam-intizamlı ordu olardı, amma bunu bacarmır. Buna gücləri çatmır. Hərçənd, belə don geyindirirlər ki, guya nəzarət edə bilirlər, amma reallıqda belə deyil.

Təəssüflər olsun ki, bunun fonunda Paşinyan da qeyri-ciddi, təzadlı və zərərli açıqlamalarla çıxış edir. O da ona görə çıxış edir ki, yəqin ki, bu kütlədən qorxur, bu yolla iğtişaşları bir qədər səngitmək istəyir və o işğtişaş iştirakçılarının istəklərinə uyğun bəzi hərəkətlər etmək istəyir ki, onunla rəqabət aparan qüvvələrin dayaqlarını bir az sarsıtsın, zəiflətsin. Çox təəssüf ki, bu da son nəticə etibarilə danışıqlara mənfi təsir göstərir və ciddi nəticələrin əldə olunmaması ilə bağlı proqnozları doğruldur. 

Çətin ki, Paşinyanı devirə bilsinlər. Onun da müqaviməti kifayət qədər təsirlidir. Çünki polis, güc strukturlarının böyük hissəsi onun tərəfindədirlər. Eyni zamanda cəmiyyətin əksəriyyəti Paşinyanın tərəfindədir. Onlar küçələrə, meydanlara çıxmırlar, o demək deyil ki, onlar Paşinyanı dəstəkləmirlər. Yox, onlar Paşinyanı dəstəkləyirlər. Əgər Paşinyan istəsə onları da meydanlara çıxardar. O, bunu ona görə istəmir ki, vətəndaş müharibəsinə səbəb ola bilər. Amma onun da kifayət qədər çoxlu tərəfdaşları var. Bu da onu düşünməyə əsas verir ki, Paşinyan hakimiyyətini devirmək mümkün olmayacaq".

Təhməz Əsədov
Milli.Az