Maraqlı

Əyripəncəlik nədir və uşaqlarda bu problem necə aradan qaldırılır?

23 Yanvar 2021 23:20
Baxış: 2 609
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Körpələrdə rast gəlinən ortopedik problemlərdən biri də əyripəncəlikdir. Mütəxəssislər hesab edir ki, bu problem sonradan fəsadların yaranmaması üçün uşaq doğulandan sonrakı qısa müddətdə aradan qaldırılmalıdır.

Ortoped-travmatoloq, uzman həkim Rəşad Zeynalov bildirib ki, əyripəncəlik ən çox rastlanan anadangəlmə əzələ-sümük sistemi patologiyalarından biridir. Bu halda topuq və ayaq barmaqları aşağı və içə dönmüş vəziyyətdə olur. Baldır və ayaq normadan qısa olur. Əyripəncəlikdə ağrı olmur və müalicə edilə bilən bir xəstəlikdir. Müalicə sonrası uşaq tam normal həyata dönə bilir.

Həkimin sözlərinə görə, bu hala hər 1000 doğuşdan birində rastlanır. Hər 3 xəstədən birində patologiya iki tərəfli görülür. Hər 3 nəfərdən ikisi oğlan uşaqlarıdır. Valideynlərdən birində bu patologiya varsa, uşaqda görülmə ehtimalı 3-4%-dir. Valideynlərin hər ikisində olubsa uşaqda olma ehtimalı 30%-ə qədər yüksəlir.

Diaqnoz müayinə zamanı qoyulur. Ana bətnində ikən 16 həftəlikdən sonra ultrasəs müayinəsi yardımı ilə bu patologiya hamiləlik zamanı da müəyyən edilə bilər. Bu patologiya ilə yanaşı uşaqda bud-çanaq oynağı displaziyası və əyriboyunluq rastlana bilər. Bu patologiyalar da diqqətlə yoxlanılmalıdır.

Onun sözlərinə görə, bu patologiyanın müalicəsində ən yayılmış və effektiv metod "Ponseti gipsləmə" metodudur. Müalicə doğuşdan 1 həftə sonra başlanır.  Məqsəd ağrısız, funksional və düzgün ayaq əldə etməkdir. Həkim yavaşca və tədricən ayağı gərməklə düzəldir və bu vəziyyəti gips qoyaraq  qoruyur. Hər həftə bu şəkildə ayaq tədricən düzəldilərək gipsə qoyulur. Bu prosedura ortalama 6-8 gipslə sonlanır. Əyriliyin dərəcəsi və sərtliyindən asılı olaraq daha çox və ya daha az gips qoymaq lazım gələ bilər. Ən son gips öncəsi axil vətəri uzadılır. Bu prosedura əməliyyatxanada sedasiya altında dəridə yarım santimetrlik kəsik aparılaraq icra olunur və axil vətəri uzadılır. Ardından ayaq maksimum düzəldilmiş vəziyyətdə gipsə qoyulur. Son gips 2 həftə qaldıqdan sonra çıxarılır və ayaqlar  Dennis-Brown şinasına qoyulur. Bu şina 24 saat uşağın ayağına taxılı vəziyyətdə olur. Sadəcə bir neçə dəfə havalandırmaq və hərəkət üçün çıxarılır. İlk 3 ay hər şey qaydasında davam etdikdə, daha sonra şina gündüzlər və gecələr körpə yatarkən taxılır. Dennis- Brown şinası uşaq 3-4 yaşına gələnə qədər taxılır. Bu şina taxılmadıqda ayaq yenidən əyilə bilər. Bundan əlavə uşaqlar 7-8 yaşına qədər illik kontrola çağrılmalıdır. Ponseti metodu xəstə 3-4 yaşına qədər olduqda, digər metodlar fayda vermədikdə və deformasiya təkrarlandıqda və ya yumşaq toxuma əməliyyatından öncə tətbiq edilə bilər.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.