Münasibətlərdə “2:2:2” qaydası - Bir-birinizə vaxt ayırmağın sadə yolu

Gündəlik işlər və qayğılar bəzən cütlüklərin birlikdə vaxt keçirməsini arxa plana keçirir. "2:2:2" qaydası isə münasibətlərə müntəzəm vaxt ayırmaq üçün təklif olunan sadə üsuldur.

Milli.Az xəbər verir ki, bu yanaşma üç vərdişə əsaslanır: iki həftədən bir romantik görüş, iki aydan bir yalnız ikinizin keçirəcəyi həftəsonu və iki ildən bir birlikdə bir həftəlik tətil.

İki həftədən bir görüş

Birlikdə kinoya getmək, parkda gəzmək və ya sakit bir yerdə qəhvə içmək belə görüş sayıla bilər. Əsas məqsəd həmin vaxtı bir-birinizə ayırmaqdır.

Telefonları kənara qoymaq, gündəlik işlərdən başqa mövzularda danışmaq və qarşı tərəfi diqqətlə dinləmək ünsiyyət üçün fürsət yaradır. Görüşü əvvəlcədən planlaşdırmaq isə sıx iş qrafikində ona vaxt tapmağı asanlaşdıra bilər.

İki aydan bir həftəsonu istirahəti

Qaydanın ikinci hissəsi iki aydan bir həftəsonunu baş-başa keçirməyi nəzərdə tutur. Bunun üçün bahalı otel və ya uzaq səfər vacib deyil. Yaxın bir şəhərə getmək, təbiətdə dincəlmək və ya kiçik bir evdə gecələmək də seçim ola bilər.

Məqalədə bildirilir ki, mühitin dəyişməsi cütlüklərə gündəlik qayğılardan uzaqlaşmağa və birlikdə yeni xatirələr yaratmağa kömək edə bilər.

İki ildən bir bir həftəlik tətil

Üçüncü addım iki ildən bir yalnız ikinizin qatıldığı bir həftəlik tətil planlaşdırmaqdır. Məqsəd gündəlik öhdəliklərdən bir müddət uzaqlaşıb bir-birinizə daha çox vaxt ayırmaqdır.

Belə istirahət zamanı yeni yerlər görmək, ortaq maraqlara vaxt ayırmaq və tələsmədən söhbət etmək mümkündür.

Vaxt və büdcə məhduddursa...

Bu qaydanı dəyişməz cədvəl kimi qəbul etmək lazım deyil. Hər cütlük onu imkanlarına və həyat şəraitinə uyğunlaşdıra bilər. Parkda piknik və ya evdə sakit bir axşam da birlikdə vaxt keçirmək üçün fürsətdir.

"2:2:2" bütün münasibət problemlərini həll edən üsul kimi deyil, bir-birinə vaxt ayırmağı xatırladan yanaşma kimi təqdim olunur. Əsas məsələ xərclənən puldan çox, qarşılıqlı diqqət və birlikdə keçirilən vaxtdır. (lent.az)

Müəllif: Ülkər Vəliyeva (Milli.Az redaktor)