Nahardan sonra yuxunuz gəlirsə, səbəb təkcə yorğunluq deyil

Nahardan sonra güclü yuxululuq hissi bir çox insana tanışdır. Bəzən bu, orqanizmin təbii bioloji ritmləri ilə bağlı olur.

Milli.Az lent.az-a istinadən bildirir ki, ancaq gündüz yuxululuğu davamlı və çox güclüdürsə, bəzi sağlamlıq problemlərinin əlaməti ola bilər.

Təbii bioritmlər və qidalanma

Günün ikinci yarısında enerjinin azalması normal fizioloji hal hesab olunur. İnsan gecə kifayət qədər yatsa belə, daxili bioloji saat müəyyən vaxtlarda orqanizmə istirahət siqnalı verə bilər. Lakin düzgün olmayan qidalanma bu vəziyyəti daha da gücləndirir.

Səhər yeməyini ötürüb naharda çox yemək qanda şəkərin səviyyəsinin sürətlə dəyişməsinə və güclü halsızlığa səbəb ola bilər. Şirniyyat və enerji içkiləri qısa müddətə gümrahlıq versə də, sonradan halsızlıq daha da arta bilər.

Davamlı yorğunluğun tibbi səbəbləri

Əgər gecə kifayət qədər yatmağınıza baxmayaraq, gün ərzində gözlərinizi açıq saxlamaqda çətinlik çəkirsinizsə, bunun səbəbi sağlamlıqla bağlı ola bilər. Dəmir, B12 vitamini və fol turşusu çatışmazlığı, eləcə də anemiya daimi yorğunluq və zəiflik yarada bilər.

Qalxanabənzər vəzin fəaliyyətinin zəifləməsi maddələr mübadiləsini yavaşladaraq insanda enerji azlığına səbəb ola bilər. Gündüz səbəbsiz və güclü yuxululuq bəzi hallarda şəkərli diabetin ilkin əlamətlərindən biri də ola bilər. Xüsusilə bununla yanaşı, daimi susuzluq hissi də varsa, müayinə olunmaq məsləhətdir.

Həyat tərzi də təsir edir

Az hərəkətli həyat tərzi yorğunluğu daha da artıra bilər. Mütəxəssislər kompüter qarşısında növbəti fincan qəhvəni içmək əvəzinə qısa gəzintiyə çıxmağı tövsiyə edirlər. Fiziki hərəkət diqqəti və enerji səviyyəsini yaxşılaşdıra bilər. Xroniki stress və narahatlıq da gecə yuxusunun keyfiyyətini aşağı salır.

Bundan başqa, allergiya əleyhinə bəzi preparatlar və müəyyən antidepressantlar yuxululuq yarada bilər. Əgər gündüz yuxululuğu işinizə, avtomobil idarə etməyə və gündəlik fəaliyyətinizə mane olursa, həkimə müraciət etmək lazımdır. Sinə ağrısı, güclü halsızlıq və ya digər qeyri-adi əlamətlər də varsa, tibbi müayinəni gecikdirmək olmaz.

Müəllif: Tural Hüseyn (Milli.Az redaktor)