Bəlkə də təmizliyə səhv otaqdan başlayırsınız - Mütəxəssislər ilk dayanacağı açıqladı

Evin təmizliyinə hansı otaqdan başlamaq lazım olduğu həm vaxta qənaət etmək, həm də daha effektiv nəticə almaq istəyənləri ən çox maraqlandıran mövzular arasındadır. Mütəxəssislərə görə, təmizliyə müəyyən bir otaqdan başlamaq gigiyena və praktiklik baxımından ən doğru üsul kimi ön plana çıxır.

Milli.Az xəbər verir ki, peşəkar təmizlik mütəxəssisi İzabella Flores təmizliyə hansı otaqdan başlamaq lazım olduğunu açıqlayıb.

İlk dayanacaq: Mətbəx
Mütəxəssis mətbəxin evdə ən çox səthə malik sahə olduğunu bildirir. Stolüstü səthlər, şkaf qapaqları, plitə, soba, soyuducu və çanaq kimi bir çox fərqli nöqtənin müntəzəm təmizlənməsi vacibdir. Bundan əlavə, yağ qalıqları, yemək artıqları və çarpaz çirklənmə riski səbəbindən mətbəx sağlamlıq baxımından da ən çox diqqət yetirilməli olan sahələrin başında gəlir.

Təmizliyə mətbəxdən başlamaq psixoloji cəhətdən də mühüm üstünlüklər təmin edir. Gündəlik həyatda ən intensiv istifadə olunan sahələrdən biri olan mətbəxin təmizlənməsi evin ümumi görünüşünü qısa müddətdə dəyişir. Bu da insanda uğur hissi yaradaraq digər otaqların təmizliyi üçün motivasiya verir.

İkinci olaraq təmizlənməli olan sahə: Hamam otağı
Mətbəxdən sonra təmizlənməsi tövsiyə edilən ikinci sahə hamam otaqlarıdır. Gigiyena baxımından böyük əhəmiyyət kəsb edən hamam otaqları adətən qısa müddətdə yığışdırıla bildiyi üçün təmizliyin erkən mərhələlərində tamamlanması evin daha fərəhli və nizamlı görünməsinə kömək edir. Xüsusilə qonaq qəbul ediləcək günlərdə hamam təmizliyi prioritet hesab olunur.

Ardınca isə bu otaqlar gəlir
Hamam otaqlarından sonra qonaq və yaşayış otaqları təmizlənməlidir. Gün ərzində ən çox istifadə olunan bu sahələrdə dağınıq əşyaların yığılması, örtüklərin qatlanması, masa və mebellərin tozunun alınması tövsiyə olunur. Sonda yataq otaqları nizamlanaraq ümumi təmizlik tamamlana bilər.

Həmişə eyni ardıcıllıq izlənilməlidir
Mütəxəssislər hansı otaqdan başlamağınızdan asılı olmayaraq, hər otaqda eyni sıranın izlənilməli olduğunu vurğulayırlar: Təmizlik həmişə yuxarıdan aşağıya doğru edilməlidir.

Yuxarı səthlər: Əvvəlcə rəflər, şkafların üstü və masa səthləri təmizlənməlidir.

Döşəmə: Tozsoranla təmizləmə və silmə işi ən sona saxlanılmalıdır.

Beləliklə, yuxarı səthlərdən tökülən toz və qırıntılar tək dəfəyə təmizlənmiş olur.

Ən çox edilən səhv
Təmizlik zamanı yol verilən səhvlərdən biri bir otağı bitirmədən başqa otağa keçməkdir. Bu, həm vaxt itkisinə yol açır, həm də işin tamamlanmasını çətinləşdirir. Həmçinin evin ən çox istifadə olunan hissələrinin nəzərdən qaçırılması da tez-tez rast gəlinən səhvlər arasındadır.

Təmizliyi asanlaşdırmaq üçün bütün lazımi ləvazimatların əvvəlcədən hazırlanması tövsiyə olunur. Təmizlik vasitələri, bezlər, süpürgə və digər avadanlıqların əl altında olması prosesin kəsintisiz irəliləməsini təmin edir. Bundan əlavə, bir yoxlama siyahısı hazırlamaq işləri daha sistemli yürütməyə kömək edir.

Lalə Qüdrətova
Milli.Az