Yeni alınan paltarları geyinməzdən əvvəl yumaq lazımdır?

Yeni paltarlardan xəstəlik keçməsi çox nadir hallarda baş versə də, mütəxəssislər bildirir ki, mikroblar və bakteriyalar paltarların üzərində günlərlə, hətta həftələrlə yaşaya bilər. Bu səbəbdən, yeni geyimlərin ilk istifadədən əvvəl yuyulması məsələsi yenidən gündəmə gəlib.

Milli.Az xəbər verir ki, elm adamları və tekstil sahəsinin mütəxəssisləri razılaşırlar ki, həm istehsal prosesində istifadə olunan kimyəvi maddələr, həm artıq boya, həm də daşınma zamanı geyimlərə hopan kir yalnız yuma yolu ilə aradan qaldırıla bilər.

Cornell Universitetinin elyaf texnologiyası üzrə mütəxəssisi Frensis Kozen açıqlamasında bildirib ki, paltarlar istehsal olunduğu andan satışa çıxana qədər müxtəlif ölkələrdə, çoxsaylı insanların əlindən keçir. Bu isə, xüsusilə həssas dəriyə malik insanlarda qıcıqlanma və allergiya riskini artırır.

The Independent nəşrinin məlumatına görə, 2020-ci ildə aparılan bir araşdırma bakteriya və virusların bəzi parça növləri üzərində günlərlə, hətta həftələrlə yaşaya bildiyini ortaya çıxarıb. Bu isə mağazada başqa müştərilər tərəfindən geyinilib çıxarılan paltarların yuyulmadan istifadəsi zamanı infeksiya riskini artırır.

Vanderbilt Sağlamlıq Mərkəzinin dermatologiya üzrə mütəxəssisi Dr. Cami L. Miller Southern Livingə açıqlamasında qeyd edib ki, mağazada paltarları kimin sınaqdan keçirdiyi bilinmir və buna görə də bakteri və virus keçmə ehtimalını nəzərdən qaçırmaq olmaz. O, əvvəlki araşdırmalarda sınaqdan keçirilən geyimlər üzərində nəcis mənşəli bakteriyalardan tutmuş burun viruslarına qədər müxtəlif mikroorqanizmlərin tapıldığını, hətta bit, uyuz və taxtabiti kimi parazitlərin də parçalar üzərində bir neçə gün yaşaya bildiyini xatırladıb.

Yeni paltarlardan xəstəlik keçməsi nadir olsa da, mütəxəssislər xüsusilə parlaq rəngli məhsulların boyasının dəriyə və ya mebellərə keçməsinin qarşısını almaq üçün ilk yumanın vacibliyini vurğulayırlar. Qırmızı sviterlər və tünd rəngli cins şalvarlar bu baxımdan daha riskli qrupda yer alır.

Paltarların ilk istifadədən əvvəl yuyulması onların daha uzunömürlü olmasına da kömək edir. Lakin isti su və yüksək temperaturda qurudulma bəzi materialların büzüşməsinə və formasının pozulmasına səbəb ola bilər. Moda Texnologiyaları İnstitutundan Nomi Deil Kleynman geyimlərin formasını qorumaq üçün soyuq suda yuyulmasını və aşağı temperaturda, mümkün olduqda isə asaraq qurudulmasını tövsiyə edir.

Lalə Qüdrətova
Milli.Az