Bakıda güclü yanğın olub: 12 nəfər tüstüdən zəhərlənib - VİDEO - FOTO

20:21

Yasamalda baş verən yanğında zəhərlənmə diaqnozu ilə xəstəxanaya aparılan 2 nəfərin vəziyyəti məlum olub.

TƏBİB-dən bildirilib ki, 31.10.2024-cü ildə tüstüdən zəhərlənmə diaqnozu ilə iki nəfər şəxs (bir kişi, bir qadın cinsli) Kliniki Tibbi Mərkəzə hospitalizasiya ediliblər.

"Hər iki şəxsə zəruri tibbi xidmətlər göstərilib, ambulator müalicə üçün evə buraxılmaları nəzərdə tutulub",- qurumdan qeyd edilib.

Qeyd edək ki, Yasamalda çoxmərtəbəli binada yanğın baş verib. Yanğın yanğından mühafizə orqanları tərəfindən məhdudlaşdırılıb.

--------------
17:27

Yasamalda binada baş verən yanğında 12 nəfər tüstüdən zəhərlənib.

TƏBİB-dən Milli.Az-a bildirilib ki, Respublika Təcili və Təxirəsalınmaz Tibbi Yardım Mərkəzinə 31.10.2024-cü il tarixində saat 16:20 radələrində Bakı şəhəri, Yasamal rayonu, Əsəd Əhmədov küçəsində çoxmərtəbəli yaşayış binasında yanğın səbəbilə çağırış daxil olub. Çağırış ünvanına 4 təcili tibbi yardım briqadası cəlb olunub.

"İlkin məlumata görə, təcili tibbi yardım briqadası tərəfindən 12 nəfərə tüstüdən zəhərlənmə diaqnozu ilə yerində tibbi yardım göstərilib. İki nəfər tüstüdən zəhərlənmə diaqnozu ilə Kliniki Tibbi Mərkəzin Toksikologiya şöbəsinə təxliyə olunub",- qurumdan əlavə edilib.

Qeyd edək ki, hadisə yerinə Fövqəladə Hallar Nazirliyinin müvafiq xilasetmə qüvvələri cəlb olunublar. Hazırda yanğınsöndürmə və digər təxirəsalınmaz işlər həyata keçirilir.

------

17:20

Məlumat verildiyi kimi, Bakı şəhəri, Yasamal rayonu, Ə.Əhmədov küçəsində yerləşən çoxmərtəbəli yaşayış binasında baş vermiş yanğınla əlaqədar Fövqəladə Hallar Nazirliyi Dövlət Yanğından Mühafizə Xidməti və Xüsusi Riskli Xilasetmə Xidmətinin qüvvələri dərhal əraziyə cəlb olunub.

Milli.Az xəbər verir ki, bu barədə Fövqəladə Hallar Nazirliyi məlumat yayıb.

Bildirilib ki, nazirliyin qüvvələrinin operativ müdaxiləsi sayəsində onyeddimərtəbəli yaşayış binasının elektrik şaxtasında baş vermiş yanğın mənzillərə keçməsinə imkan verilmədən qısa müddətdə söndürülüb.

"Təhlükəsizlik tədbirləri çərçivəsində bina sakinlərinin təxliyəsi həyata keçirilib",- əlavə edilib.

-------

16:40

Yeni Yasamal rayonu Əsəd Əhmədov küçəsində çoxmərtəbəli binada yanğın baş verib.

Bu barədə Milli.Az-a Fövqəladə Hallar Nazirliyindən məlumat verilib.

Bildirilib ki, məlumatla əlaqədar Nazirliyin müvafiq xilasetmə qüvvələri çağırış üzrə cəlb olunublar.

Hazırda yanğınsöndürmə və digər təxirəsalınmaz işlər həyata keçirilir.

Əlavə məlumat veriləcək.

Milli.Az