“Starlink” qurğuları ölkəyə buraxılmır? - Rəsmi CAVAB

Xəbər verdiyimiz kimi, "Starlink" internet xidmətinin Azərbaycanda fəaliyyətə başlamasına baxmayaraq, sifarişçilərin sözügedən cihazı ölkəyə gətirmələrində problemlərlə üzləşdiyi iddia olunurdu. Belə ki, sözügedən qurğunun gömrükdə rəsmiləşdirilməsində süni əngəllərin yaradılmasının yekunda məhsulun sifarişçiyə gəlib çıxamamasına səbəb olması ilə bağlı iddialar yayılıb.

Yayılmış iddialarla bağlı Dövlət Gömrük Komitəsindən (DGK) Trend-in sorğusuna cavab olaraq bildirilmişdi ki, sifarişçi gömrükdə belə problemlə üzləşməməsi üçün Azərbaycan Respublikasının Rəqəmsal İnkişaf və Nəqliyyat Nazirliyindən (RİNN) xüsusi icazə almalıdır.

Artıq yayılan iddialarla bağlı RİNN-də öz mövqeyini bildirib.

Belə ki, nazirlkdən Trend-in sorğusuna cavab olaraq qeyd olunub ki, sözügedən avadanlıqlar "Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında" Azərbaycan Respublikası Qanununun 4-cü maddəsinə əsasən, kosmik peyk rabitə vasitəsi kimi təsnifləşdirilib.

"Azərbaycan Respublikası Prezidentinin 2005-ci il 12 sentyabr tarixli 292 nömrəli Fərmanı ilə təsdiq edilmiş "Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların dövriyyəsinə xüsusi icazə verən mərkəzi icra hakimiyyəti orqanlarının Siyahısı"nın 4-cü bəndinə əsasən, həmin əşyaların mülki dövriyyəsinə xüsusi icazə Azərbaycan Respublikasının Rəqəmsal İnkişaf və Nəqliyyat Nazirliyi tərəfindən verilir", - deyə məlumatda vurğulanıb.

Sadə dildə ifadə etsək, sifarişçi gömrükdə "Starlink" qurğularının ölkəyə keçirilməsində problemlərlə qarşılaşmaması üçün RİNN-dən xüsusi icazə almalıdır. Yalnız bundan sonra sözügedən avadanlıqlar istifadəçilər üçün əlçatan ola bilər.

Milli.Az