Texnologiya

Yeni "iPhone" satışa çıxdı: "Apple" əməkdaşları etirazlara başladılar

19 Sentyabr 2026 18:07

Baxış: 2 364

VTB-də minimal faiz dərəcəsi ilə nağd kredit 9.9%-dən

#TEXNOLOGİYA #İPHONE #APPLE

İtaliyadakı "Apple" mağazalarının əməkdaşları kadr çatışmazlığı və iş yükünün artması səbəbindən sentyabrın 18-də tam iş növbəsini əhatə edən ümummilli tətil keçiriblər.

Milli.Az oxu.az-a istinadən xəbər verir ki, bu barədə aksiyanı "Fisascat CISL" və "Uiltucs" həmkarlar ittifaqları ilə birgə təşkil edən İtaliya Ticarət, Turizm və Xidmət İşçiləri Federasiyası ("Filcams CGIL") məlumat yayıb.

Etiraz aksiyaları ölkənin böyük şəhərlərindəki mağazaların, o cümlədən Milanın Liberti meydanında və Romanın Via del Corso küçəsində yerləşən əsas mağazaların qarşısında keçirilib.

Həmkarlar ittifaqları işə qəbul prosesinin sürətləndirilməsini, müvəqqəti işçilərin bir hissəsinin daimi müqaviləyə keçirilməsini və natamam iş günü çalışanlara öz istəkləri ilə iş saatlarını artırmaq imkanının yaradılmasını təklif edirlər.

"Filcams CGIL" tərəfindən verilən açıqlamada bildirilib:

"Mağaza əməkdaşları artıq uzun müddətdir ki, gərginlik şəraitində işləyirlər və bu vəziyyəti daha da ağırlaşdırmaq olmaz. Biz mövcud təşkilati problemlərin həlli üçün konkret addımlar təklif etdik, lakin hələlik müvafiq cavab almamışıq".

Həmkarlar ittifaqı qeyd edib ki, "Apple" gəlirlərini və satışlarını artırmağa davam edir, şirkətin qlobal bazar dəyəri isə 5 trilyon dollara yaxınlaşır.

Təşkilatın mövqeyinə görə, şirkət məhsuldarlığın artımına işçilərin əmək şəraitini pisləşdirmək hesabına nail olmamalı və mağazalarda müştərilərə xidmət göstərən personalın tələblərinə cavab verməlidir.

Qeyd edək ki, "Apple" sentyabrın 9-da "iPhone 18 Pro" və "Pro Max" modellərini nümayiş etdirib. Yeni cihazlar üçün ABŞ-də ilkin sifarişlər sentyabrın 11-də başlayıb, sentyabrın 18-dən isə 65-dən çox ölkədə rəsmi satışlara start verilib.

Müəllif: Tural Hüseyn (Milli.Az redaktor)