Qarpızı çox yeməyin fəsadları

Yay aylarında süfrələrdən əskik olmayan qarpız yüksək su tərkibinə görə isti havalarda ən çox seçilən meyvələrdəndir. Lakin mütəxəssislər qarpızın da ölçülü şəkildə istehlak edilməsinin vacib olduğunu bildirirlər.

Milli.Az xəbər verir ki, dietoloq Şevval Işıklı xüsusilə diabet və insulin müqaviməti olan şəxslərin qarpız yeyərkən porsiya nəzarətinə diqqət etməli olduğunu vurğulayıb.

Qarpız faydalıdır, amma həddindən artıq yemək olmaz

Qarpızın böyük hissəsi sudan ibarətdir. Bununla yanaşı, onun tərkibində C vitamini, beta-karoten, kalium və likopen kimi faydalı qida maddələri də mövcuddur.

Lakin qarpızın təbii şəkər ehtiva etdiyini xatırladan Işıklı sağlam meyvə olmasının onun limitsiz miqdarda yeyilə biləcəyi anlamına gəlmədiyini qeyd edib.

Xüsusilə böyük porsiyada qarpızı bir dəfəyə yemək qan şəkərinin sürətlə yüksəlməsinə səbəb ola bilər. Bu risk qan şəkərinə nəzarəti həssas olan insanlarda daha yüksəkdir.

Həddindən artıq qarpız həzm problemlərinə səbəb ola bilər

Mütəxəssisin sözlərinə görə, qarpızın çox miqdarda istehlakı bəzi insanlarda həzm sistemi ilə bağlı narahatlıqlara da yol aça bilər. Şişkinlik, qaz, qarın ağrısı və ishal kimi problemlər yarana bilər.

Bu səbəbdən "böyük hissəsi sudur" düşüncəsi ilə qarpızın nəzarətsiz şəkildə yeyilməsi tövsiyə edilmir.

Qarpızı nə ilə birlikdə yemək daha uyğundur?

Qarpızın tərkibində zülal və yağ az olduğundan onu təkbaşına yemək uzun müddət toxluq hissi yaratmaya bilər. Qatıq, kefir, pendir və ya ölçülü miqdarda çərəzlə birlikdə istehlak etmək toxluq müddətini uzatmağa və qan şəkərinin daha balanslı qalmasına kömək edə bilər.

Diabet xəstələri qarpızdan imtina etməlidirmi?

Mütəxəssis diabet və insulin müqaviməti olan insanların qarpızı qidalanmalarından tamamilə çıxarmasına ehtiyac olmadığını bildirir. Əsas məsələ porsiyanın fərdi qan şəkəri hədəflərinə və qidalanma planına uyğun müəyyənləşdirilməsidir.
Diabet müalicəsi alan şəxslərə qarpızın qəbul miqdarını həkim və ya dietoloqla məsləhətləşərək müəyyənləşdirmək tövsiyə olunur.

Müəllif: Tural Hüseyn (Milli.Az redaktor)