Nazirlikdən əhaliyə çağırış - Uşaqlar risk altındadır, böyüklər isə...

"Qrip infeksiyası ilə mübarizədə ən təsirli vasitə spesifik peyvəndin istifadə olunmasıdır. Peyvəndin tərkibində canlı virus olmadığından peyvənd olunmuş şəxs qriplə xəstələnə bilməz".

Milli.Az xəbər verir ki, bunu canlı yayımda nazirliyin mütəxəssis-eksperti, infeksionist Təyyar Eyvazov deyib.

Onun sözlərinə görə, vaksinasiya olunan şəxslərdə həmin qrip ştamlarına qarşı immunitet formalaşır.

"Ona görə peyvənd olunmuş şəxsin orqanizmi artıq bu virusların hissəcikləri ilə təmasda olduğu üçün payız-qış aylarında baş verən yoluxma zamanı onların əksər hissəsi xəstələnmir və ya infeksiyanı simptomsuz keçirir. Digər qismi isə hətta xəstələnərsə belə, bu zaman xəstəlik yüngül keçir, fəsadlaşmır və tezliklə sağalma baş verir".

Qeyd edib ki, immun sistemi yaşa görə hələ tam formalaşmamış 5 yaşdan kiçik uşaqlar, fizioloji immunsupressiyası olan hamilə qadınlar, 65+ yaşlı ahıl şəxslər, o cümlədən müxtəlif ağır, xroniki xəstəlikləri hesabına immun sistemi zəifləmiş şəxslər qrip infeksiyasını daha əlverişsiz keçirir.

"Peyvənd vasitəsilə birinci növbədə bu şəxsləri qorumaq lazımdır. Beləliklə, qripə qarşı peyvənd olunmaqla özünüzü bir çox xoşagəlməz və bəzən pis nəticələnən xəstəlik hallarından sığortalaya bilərsiniz".

Nəzərə çatdırıb ki, uşaq orqanizmi hələ tam formalaşmadığı üçün müxtəlif infeksiyalara, o cümlədən qripə qarşı heç də həmişə adekvat reaksiya verə bilmir.

"Valideynlər xəstə uşağı bağçaya, məktəbə göndərməməlidirlər. Xəstə uşaq evdə imkan daxilində izolə edilməli, birinci növbədə 5 yaşın altında olan uşaqların valideynləri dərhal həkimə müraciət etməlidirlər. 3-5 gündən çox müddətdə hərarətin yüksək qalması və ya azalaraq yenidən artması qripin ağır və ya fəsadlaşmış gedişindən xəbər verir. Belə hallarda özünü müalicə ilə məşğul olmamalı və təcili həkimə müraciət etmək lazımdır".

Bildirib ki, qrip zamanı yüksək hərarət kiçik yaşlı uşaqlarda qıcolmalara səbəb ola bilər, həmçinin inaq inkişaf edə bilər. Bu hallar uşağın həyatı üçün ciddi təhlükə yaradır.

Söyləyib ki, peyvənd olunmaq könüllü olduğundan əhali arasında aparılan maariflənmənin məqsədi məhz risk qrupuna daxil olan həmin şəxslərin birinci növbədə tibb müəssisələrinə peyvənd olunmaq üçün müraciət etməsinə nail olmaqdır:

"Əhali yaşayış və iş yerlərində ərazi üzrə xidmət göstərən ambulator-poliklinik tibb müəssisələrinə müraciət etməklə ödənişsiz əsaslarla peyvənd oluna bilərlər. Peyvənd olunduqdan sonra ən azı 2 həftə lazımdır ki, qripə qarşı immunitet formalaşsın. Ona görə daha yaxşı olar ki, peyvənd qripin daha az yayıldığı sentyabr və ya oktyabr aylarında vurulsun. Lakin bütün epidemik fəsil boyu da bunu etmək olar".

Mina Mikayılova
Milli.Az